Noss-auturs

Tgi scriva en Rumantschia? Avais mirveglias tge scrivents che nossa patria ha laschà nascher? Alura dai in'egliada en noss dossier, quel porscha ina schelta d'auturas e d'auturs rumantschs. Nus essan sa spruvads da preschentar auturs giuvens e vegls, umens e dunnas che vegnan da tuttas regiuns linguisticas da la Rumantschia. La schelta n'è betg definitiva e po adina puspè vegnir cumplettada.

Andry, Dumenic

* 07-05-1960 a Turitg Dumenic Andry è creschì si a Ramosch. Suenter la matura a la scola chantunala a Cuira ha el studegià romanistica a l'universitad da Turitg. Dumenic Andry lavura oz sco scolast a l'Institut Otalpin Ftan nua ch'el instruescha rumantsch. El viva cun sia dunna ed ils dus uffants a Zuoz. Regularmain fa el contribuziuns per La Quotidiana e per l'emissiun "Impuls" da Radio Rumantsch. Dumenic Andry scriva oravant tut prosa e publitgescha en gasettas e revistas.

Badel, Flurina

* 22-10-1983 a Lavin Flurina Badel è creschida si en l'Engiadina Bassa. Suenter il gimnasi ha ella fatg ina scolaziun sco raquintadra da parablas e divers viadis. Dal 2005 fin il 2009 ha ella lavurà tar la Televisiun Rumantscha sco moderatura e redactura. Uss è ella artista e schurnalista libra, activa sco autura da films, scriptura, perfurma e fa adina puspè part da projects da teater.

Bardill, Linard

* 16-10-1956 a Cuira Linard Bardill ha passentà sia uffanza e giuventetgna en il Grischun. A Schiers ha el frequentà durant set onns il gimnasi. Suenter la matura l'onn 1977 ha el fatg in viadi en l'India. Enavos en Svizra ha el studegià teologia a l'universitad da Turitg e finì ses studi l'onn 1984. Suenter ha el cumenzà a far teater. Bardill è er in enconuschent chantautur e cabarettist. Ils ultims onns ha Linard Bardill che viva a Scharans fatg in num sco autur da cudeschs d'uffants.

Bernardi, Rut

* 04-08-1962 a St. Ulrich (Urtijëi) en Val Gardena Rut Bernardi è creschida si a St. Ulrich (per ladin Urtijëi) en Val Gardena. Ella ha frequentà il gimnasi a Stams en l'Austria. Suenter ha ella studegià romanistica a l'universitad dad Innsbruck. Bernardi ha collavurà tar il "Handbuch des Rätoromanischen (universitad da Turitg). A St. Ulrich ha ella instruì ladin. Docenta per rumantsch a las universitads da Turitg, Innsbruck e Minca. Translatura, schurnalista ed autura. Viva a Klausen en il Tirol dal Sid.

Bertogg, Annamengia

* 10-06-1928 a Pitasch Annamengia Bertogg è creschida si a Pitasch. Suenter la scola da puras a Glion ha ella fatg curs tar la Lia Rumantscha sco mussadra da scolina e dà scolina ad Almen. Annamengia Bertogg viva oz a Castrisch.

Cadruvi Claudia

* 23-04-1965 a Zweisimmen (BE) Claudia Cadruvi è creschida si a Cuira. Il 1986 ha ella fatg la patenta da scolasta primara ed il 1990 ha ella finì l'emprendissadi da cuschiniera. Suenter ha ella lavurà temporarmain sco scolasta e sco cuschiniera en differents lieus. In onn ha ella vivì en l'Italia nua che sia emprima figlia è naschida. Il 1994 ha ella cumenzà tar il Bündner Tagblatt/La Nova sco schurnalista ed è suenter daventada redactura tar l'Agentura da novitads rumantscha (ANR). Là tgira ella tematicas da la politica naziunala e scriva dals Rumantschs da la Bassa. Oz viva Claudia Cadruvi ad Uznach, è maridada cun Martin Pfeiffer ed è mamma da trais uffants.

Camenisch, Arno

* 01-02-1978 a Tavanasa Arno Camenisch ha frequentà la scola primara e secundara a Danis/Tavanasa. Silsuenter ha el fatg il seminari da scolasts a Cuira. I suondan viadis extendids tras l'Europa, l'Australia e l'America dal Sid. Da 2004-2007 ha Arno Camenisch vivì a Madrid. Dapi il settember 2007 è el student a l'institut svizzer da litteratura a Bienna nua ch'el viva era.

Camenisch, Silvio

*31-07-1953 a Rueun Silvio Camenisch è naschì cun in frar schumellin a Rueun. El ha frequentà da 1970-75 ils seminari da scolasts a Cuira. Dà scola intgins onns a Siat, suenter a Domat nua ch'el viva anc adina. A partir da l'onn 1972 ha Silvio Camenisch cumenzà a publitgar texts en gasettas, antologias e periodicas. Da 1989-1992 è el stà redactur da "Nies Tschespet".

Candreia, Linard

* 1957 a Casti Val d'Alvra Linard Candreia ha frequentà il seminari da scolasts a Cuira. Suenter ha el fatg in studi da scolast secundar fil. I a Friburg. Dà scola a Salouf, a Churwalden, a la Scuola Svizzera di Catania, a Laax ed a la Scola mercantila Surselva. Da preschent scolast d'istorgia e linguatgs al progimnasi Laufental-Thierstein. Da 1996-2000 è Candreia stà president da la Partida socialdemocrata dal Grischun. Dirigent da differents chors, tranter auter Chor viril da Laax. Actualmain è Linard Candreia commember dal cussegl da citad da Laufen, suprastant dal Kulturforum Laufen, columnist da La Quotidiana, dal Wochenblatt Laufental-Thierstein e collavuratur dals Impuls da Radio Rumantsch.

Capeder, Dumeni

* 01-05-1934 a Trun Dumeni Capeder è naschì e creschì si a Trun. Suenter la scola primara e secundara a Trun è el stà engaschà per dus onns en in hotel. Alura ha el frequentà la scola media da traffic a Son Gagl. I suonda in emprendissadi sco funcziunari da posta diplomà. Capeder è stà funcziunari da posta a Scuol, Le Locle, La Neuveville, Fleurier e Losanna. Suenter 16 onns sco schef da servetsch tar la direcziun generala da la PTT a Berna, è el stà engaschà 3 onns sco directur da l'agid als fugitivs tar la Caritas Svizra a Lucerna. Davent da 1982 fin tar sia pensiun l'onn 1998 è el stà directur da la chasa d'attempads Steinhof a Lucerna.

Deplazes, Gion

* 22-03-1918 a Surrein Gion Deplazes è naschì e creschì si a Surrein. Ils onns 1933-39 ha el frequentà la scola claustrala a Mustér ed il seminari da scolasts a Cuira. I suondan studis universitars a Friburg e Turitg ch'el concluda sco dr. phil. I. Durant ses studis ha el anc lavurà sco scolast primar e secundar. Da 1949 fin 1990 ha Gion Deplazes instruì en il seminari da scolasts a Cuira, lura sco conrectur a la scola chantunala. Suenter sia pensiun ha el anc instruì 7 onns rumantsch a la scola da dunnas a Cuira. Tranteren è el er stà lectur per litteratura e linguatg rumantsch a l'universitad da Turitg ed a la scol'auta da Son Gagl. Gion Deplazes è s'engaschà en numerus uffizis per la cultura rumantscha. Per exempel sco redactur da Nies Tschespet, sco suprastant en la Lia rumantscha, sco president da l'Uniun da scripturas e scripturs rumantschs u sco president da la Società retorumantscha. Gion Deplazes è in dals pli enconuschents auturs sursilvans. 1942 ha el cumenzà a publitgar, 1994 èn sias ovras cumplettas cumparidas en 12 toms.

Deplazes, Lothar

* 14-08-1939 a Sagogn Lothar Deplazes, naschì l'onn 1939 e creschì si a Sagogn, ha studegià istorgia e germanistica ed ha promovì en medievistica a l'universitad da Turitg. El ha collavurà per cudeschs da documents medievals dals chantuns Tessin e Grischun e scrit studis oravant tut da l'istorgia medievala dal territori alpin e sias relaziuns cun l'imperi e l'Italia. Sper quell'activitad professiunala ha el edì las ovras dal poet liric e satiric Gion Cadieli, scrit trais librets per operas dal cumponist Gion Antoni Derungs e publitgà poesias e raquints curts en periodicas ed antologias. Lothar Deplazes viva a Küsnacht sper Turitg.

Derungs, Ursicin G. G.

*05-01-1935 a Vella Ursicin Gion Gieli Derungs ha passentà sia uffanza en Val Lumnezia. Suenter il gimnasi tip A a Mustér, ha el studegià filosofia e teologia a Roma, Tübingen e Turitg e finì cun la promoziun. Gia avant sia scolaziun universitara era Ursicin entrà en claustra a Mustér. La vita en claustra na plascheva dentant betg al giuven teolog, uschia ch'el ha annullà sia empermischun. Suenter ha el instruì al gimnasi svizzer a Milaun. Derungs che viva a Vella ed a Milaun s'ha er fatg in num sco redactur da la "Litteratura" e sco translatur da Shakespeare, Dante e Frisch per rumantsch.

Hendry, Vic

*18-08-1920 a Sedrun/Cavorgia Vic Hendry ha passentà sia uffanza en Tujetsch nua ch'el ha er frequentà las scolas elementaras. Suenter il seminari da scolasts a Cuira ha el dà scola intgins onns a Selva. I suondan studis sco scolast secundar a las universitads da Turitg, Milaun e Friburg. Scolast secundar a Camischolas ed a Schaffusa. Vic Hendry ha er lavurà en differentas instituziuns socialas e pedagogicas. Sper sia lavur sco scolast era l'autur era president da la Quarta Lingua a Turitg ed è s'engaschà sco president da l'Uniun da scripturas e scripturs rumantschs (1970-73). Plinavant è el stà redactur da la "Litteratura" (1991-95). Oz viva Vic Hendry sco autur e publicist a Schaffusa.

Hofmann Estrada, Fadrina

* 22-04-1982 a Scuol Fadrina Hofmann è creschida si a Scuol nua ch'ella ha er visità la scola primara. Il gimnasi ha ella alura frequentà a Ftan. Suenter la matura è ella sa rendida a Friburg per studegiar scienzas da media e communicaziun, schurnalissem e rumantsch. Uss è Hofmann schurnalista e mamma d'in pitschen figl. Ella ha publitgà diversas istorgias curtas en il Chalender Ladin ed en Litteraturas.

Josty, Chatrina

*04-04-1984 a Bravuogn Chatrina Josty è creschida si a Bravuogn. Suenter la scola chantunala a Cuira ha ella lavurà sco redactura tar il Radio Rumantsch. Ella è stada presidenta da la GiuRu (Giuventetgna Rumantscha) ed ha scrit per la gasetta giuvna PUNTS. Chatrina Josty ha publitgà istorgias curtas en il Chalender Ladin ed en autras antologias. Dal 2010-2013 ha ella frequentà la scol'auta da pedagogia a Cuira. Actual lavura ella tar Radiotelevisiun Svizra Rumantscha sco moderatura e redactura dal Telesguard.

Klainguti, Göri

* 01-08-1945 a Puntraschigna Göri Klainguti è naschì e creschì si a Puntraschigna. Suenter il gimnasi a Schiers suondan studis sco scolast secundar a l'universitad da Turitg. El è stà scolast a Samedan, suenter scolast real a Zuoz. Sper sia lavur sco scolast ha el adina picturà e scrit. Dapi 1990 fa il pictur artist e scrivent il pur a Samedan.

Peer, Oscar

* 23-04-1928 a Lavin - † 22-12-2013 a Cuira Oscar Peer è creschì si en l'Engiadina. Suenter il temp da scola ha el cumenzà in emprendissadi sco serrer da maschinas, ch'el n'ha dentant betg finì. Enstagl ha el fatg il seminari da scolasts a Cuira e dà scola a Tschierv e Favugn. Pli tard ha el studegià romanistica e germanistica a Turitg e Paris e promovì sco dr. phil. Alura ha el elavurà per la Lia rumantscha il "Dicziunari ladin-tudais-ch". Plinavant ha el instruì franzos e talian a Winterthur. 1970 è el turnà en il Grischun per dar scola al seminari da scolasts a Cuira. Suenter sia pensiun ha Oscar Peer sa deditgà al scriver. Il scrivent rumantsch è mort la dumengia ils 22-12-2013 en la vegliadetgna da 85 onns.

Plouda, Rut

* 18-08-1948 a Tarasp Rut Plouda ha frequentà il seminari da magisters a Cuira. Suenter ha ella dà scola a Savognin e Ftan. Anc durant il seminari aveva ella cumenzà a scriver lirica. Oz viva Rut Plouda-Stecher sco chasarina, pura e scolasta da rumantsch a Ftan. Plouda scriva oravant tut prosa curta e lirica ch'ella publitgescha en diversas gasettas e revistas.

Rüthers-Seeli, Tresa

* 28-09-1931 a Falera Tresa Rüthers-Seeli è naschida e creschida si a Falera. Ella ha fatg ina scolaziun sco scolasta da lavur e lavurà plirs onns cun uffants impedids. Rühters-Seeli ha vivì 12 onns en l'exteriur, en Frantscha ed en Germania. Oz viva ella a Bottighofen al Lai da Constanza.

Spescha, Gion Battesta

*02-10-1944 ad Andiast Gion Battesta Spescha è oriund dad Andiast e stat a Wädenswil. Las scolas ha el frequentà ad Andiast e Vuorz. Alura ha el fatg l'emprendissadi tar la posta a Langnau am Albis. Suenter sia scolaziun dad informatica tar IBM, ha el lavurà blers onns sco programmader da computers. Uss giauda Spescha la pensiun.

Tambornino, Rico

*29-05-1950 a Trun Rico Tambornino e naschì e creschì si a Trun. Là ha el er frequentà la scola primara e secundara. Suenter ha el fatg il seminari da scolasts a Cuira. Suenter la patenta da scolast primar 1971 ha el trais onns pli tard fatg il diplom en pedagogia curativa. Rico Tambornino e sia dunna han gì dus uffants. In figl ed ina figlia. Ses figl Andrea Rico è sa disgrazià mortalmain cun be 20 onns. Da preschent è Tambornino scolast. El publitgescha adina puspè en differentas gasettas e revistas.

Vigne, Benedetto

* 18-09-1951 a Belluno Benedetto Vigne è naschì a Belluno en l'Italia e creschì si a Salouf. Suenter ch'el ha frequentà il gimnasi a Mustér, suondan studis da filosofia a Turitg. Vigne lavura oz sco schurnalist e criticher da musica a Turitg.