Mandela - funtauna d'inspiraziun per ils giuvens

Il 2008 ha il grond politicher sidafrican e l'emprim president democratic da la nova Africa dal Sid, Nelson Mandela, festivà ses giubileum da 90 onns. In'exposiziun multimediala en il Käfigturm a Berna preschenta ussa sia vita e sias activitads.

Statua da Nelson Mandela Bild in Lightbox öffnen.

Legenda da maletgs: Statua da Nelson Mandela Reuters

Nelson Mandela è stà durant decennis ina figura da leader en il cumbat persistent cunter il reschim d'apartheid en l'Africa dal Sid. Ses cumbat cunter il rassissem, l'ingiustia sociala, la suppressiun e ses engaschi en favur da la reconciliaziun n'han betg mo manà natiers la democrazia en l'agen pajais, mabain han era gì in'irradiaziun mundiala. Betg mo per ils Sidafricans, mabain era per blers umans en l'entir mund è Mandela in simbol per las visiuns, la toleranza e l'ideal dals medems dretgs per tut ils umans. Quai èn valurs democraticas che stattan a cor a la Svizra e vegnan tgiradas dad ella. I n'è damai betg ina casualitad ch'ils emprims discurs ordaifer l'Africa dal Sid tranter la regenza alva e Mandela han gì lieu a Lucerna. Era suenter sia demissiun sco president è Mandela s'engaschà per la giustia e l'agid umanitar, saja quai en il process da reconciliaziun a Burundi u en la campagna cunter AIDS. Il forum politic da la Confederaziun e l'ambassada sidafricana han ussa realisà en il Käfigturm a Berna in'exposiziun multimediala davart las pli impurtantas staziuns en la vita e l'activitad da Mandela. La finamira è da preschentar ils merits e la persunalitad da quest grond democrat a las visitadras ed als visitaders da l'exposiziun, en spezial dentant als giuvenils.

L'autobiografia sco fil cotschen

L'exposiziun è vegnida preschentada avant en il Palais des Nations a Genevra. Il concept e la scenografia, sviluppads dal Svizzer Simon Haller dad Expoforum, s'orienteschan a l'autobiografia da Mandela "Long Walk to Freedom". A ses citats originals vegnan agiuntads comics, fotos ed objects. Ultra da quai preschenta l'exposiziun sequenzas da film ed intervistas, da las qualas ins po anc sa regurdar fitg bain. Bleras da quellas han oz in'impurtanza istorica. "L'exposiziun porscha gist al public en mira, giuvenils a partir da 14 onns, in'instrucziun politica illustrativa", declera Simon Haller a swissinfo. "Ella è creada a moda fitg emoziunala ed a basa d'ina persuna che tuts enconuschan." Sper quests chapitels enconuschents da la vita da Mandela datti però era tals main populars, sco sia uffanza solitaria sin la champagna en la regiun orientala dal Cap (Transkei). Ubain sia giuventetgna: el ha refusà da ses temp da maridar la spusa tschernida per el dal schef da sia gruppa etnica ed è sin quai scappà a Johannesburg, nua ch'el è vegnì confruntà cun las ingiustias dal reschim d'apartheid. Mandela vegnia a restar ina funtauna d'inspiraziun, surtut per la giuventetgna, ha ditg l'ambassadura da l'Africa dal Sid, Konji Sebati, a chaschun da la vernissascha da l'exposiziun. "La biografia da Mandela vegn a vegnir raquintada adina ed adina puspè, senza fin, a nundumbraivels giuvenils." swissinfo, Alexander Künzle