À la carte – cun RTR als Dis da litteratura a Domat

Ils Dis da litteratura da quest onn èn ids a perdunanza, han mangià, baivì e marendà. À la carte è stà il motto da quest onn, ed uschia ha er RTR envidà à table, a maisa. Radiotelevisiun Svizra Rumantscha è stà er quest onn da la partida ed ha rapportà da la surdada dal premi Terra Nova a Peter Egloff, da las prelecziuns da "las paginas", da la preschentaziun musicala da la Grischa da Corin Curschellas e da la vernissascha dal cudesch Sindoria da la giuvna scriptura Dominique Dosch.

Concurrenza à la carte "La pagina"

Tar la concurrenza da preleger ha pudì far part in e scadin ch'ha inoltrà in text betg pli lung ch'ina pagina A4 e cuntegna la frasa: "Nua è il chaschiel?". Bun in tozzel persunas han inoltrà in text.

Studio litterar da la Televisiun Rumantscha

svizrarumantscha

"A maisa cun la Televisiun Rumantscha". Quai è il motto dal Studio litterar da la Televisiun Rumantscha als Dis da litteratura 2013 a Domat. Otmar Seiler discutescha davart il baiver e mangiar en la litteratura cun il scriptur Lothar Deplazes e la redactura da cultura dal Radio Rumantsch Esther Krättli. In accent spezial porscha Gino Clavuot alias Snook cun ses rap rumantsch, realisà per la producziun "Il Gioder" da René Schnoz.

I cumenza cun veglia musica interpretada danov

Ils 23avels dis da litteratura a Domat han cumenzà il venderdi saira cun litteratura rumantscha. En il center da la saira d'avertura è dentant stada ina preschentaziun musicala dal cudesch "La Grischa". Cun il motto dals dis da litteratura da quest onn - "à la carte" baiver e mangiar en la litteratura - n'ha quai betg da far bler, dentant sveglia ella tuttina l'apetit sin dapli.

Da magliadrim e bavaretsch

Datti cudeschs che fan vegnir l'aua en bucca? Va l'amur er en ils cudeschs tras il magun? Quai èn dumondas che vegnan discutadas al Tavulin litterar cun Manfred Koch da Sent, schurnalist da litteratura tar la NZZ e professer a l'universitad da Basilea, e Claudia Knapp, dunna da cultura, cuntadina d'ulivas ed amatura da cudeschs. Ils dus cudeschs sin il Tavulin litterar tematiseschan il magliar ed il baiver: "Babettes Fest" da Tania Blixen quinta da la passiun da cuschinar e "Das Kind, das nicht fragte" da Hanns-Josef Ortheil da la cuschina siciliana, ma er da l'amur. Redacziun e moderaziun: Esther Krättli

Magazin da cultura "à la carte"

Dis da litteratura Bild in Lightbox öffnen.

Legenda da maletgs: Dis da litteratura RTR, G. Caviezel

Be necessari per viver per ils ins, in veritabel daletg per ils auters: il baiver e mangiar è in tema che fatschenta - era la litteratura e cunquai er ils 23avels Dis da litteratura a Domat da questa fin d'emna. Il magazin da cultura è a l'inscunter litterar a Domat e discurra tranter auter cun l'autur Arno Camenisch davart il baiver e mangiar e co el sa nutrescha, accumpogna il "Gioder" da G. C. Muoth a la tschertga da la dunna da sia vita cun il criteri ch'ella possia cuschinar uschè bain sco sia mamma, e sa fatschenta la fin finala er d'ina "verdura giuvna" en il mund litterar: la giuvna scriptura Dominique Dosch e ses nov cudesch "Sindoria".

"Sindoria" - nov roman da Dominique Dosch

Cuverta dal cudesch «Sindoria». Bild in Lightbox öffnen.

Legenda da maletgs: Cuverta dal cudesch «Sindoria». mad

Als Dis da litteratura è vegnì preschentà tranter auter il nov roman "Sindoria" da la giuvna autura surmirana Dominique Dosch. Nus dain in insatg da quest roman fantasy.

Premi "Terra Nova" surdà a Peter Egloff

Peter Egloff sut igl Ischi a Trun. Bild in Lightbox öffnen.

Legenda da maletgs: Peter Egloff sut igl Ischi a Trun. RTR, E. Krättli

Peter Egloff ha survegnì il premi "Terra Nova", il nov premi da la Fundaziun Schiller svizra. Quest premi è dotà cun 5'000 francs ed è vegnì surdà ad Egloff als Dis da litteratura 2013 a Domat. Quai per sias translaziuns da las ovras principalas da Leo Tuor dal rumantsch sursilvan en il tudestg. Quai è las ovras "Giacumbert Nau", "Onna Maria Tumera" e "Settembrini".