Barack Obama numna l'attatga cun bumbas in act da terrur

Suenter las attatgas cun bumba a Boston en ils Stadis Unids cun 3 morts persequiteschan las autoritads da retschertga numerusas infurmaziuns. Persunas n'han ins anc betg arrestà.

3 morts e 176 persunas blessadas pervi da las duas bumbas ch'èn explodidas al maraton a Boston. Bild in Lightbox öffnen.

Legenda da maletgs: 3 morts e 176 persunas blessadas pervi da las duas bumbas ch'èn explodidas al maraton a Boston. Reuters

A chaschun d'ina conferenza da medias ha Richard Deloriess da la polizia federala FBI discurrì da retschertgas fitg activas ed en il medem mument accentuà ch'i na dettia betg ulteriuras smanatschas. El n'ha dentant betg numnà detagls da las retschertgas. Tenor la polizia èn blessadas 176 persunas pervi da las duas bumbas ch'èn explodidas al maraton a Boston. Il president dals Stadis Unids Barak Obama numna l'attatga cun bumbas a Boston in act da terrur. La polizia federala FBI partia tar sias inquisiziuns da questa ipotesa, ha ditg Obama a la televisiun. Il ministeri da defensiun american ha entant tramess passa 1'000 gardists naziunals a Boston. Tenor las medias duain quels tranter auter gidar da segirar il lieu dal delict. (sda/aw)