Nova possessura per ustaria Parlatsch

Agnes ed Ulrich Kreilos mainan dapi 33 onns l'ustaria Parlatsch a Trin Mulin. Ussa han els cuntanschì la vegliadetgna da pensiun. Perquai ha la societad acziunara tschertgà da vender l'ustaria la stad passada. La nova possessura è la figlia dals ustiers actuals, Petra Kreilos.

Petra Kreilos sa legra da pudair manar l'ustaria Parlatsch a Trin Mulin. Bild in Lightbox öffnen.

Legenda da maletgs: Petra Kreilos sa legra da pudair manar l'ustaria Parlatsch a Trin Mulin. RTR, G. Hosang

Tschertgà nova sfida Petra Kreilos è creschida si en l'ustaria Parlatsch. Ella ha fatg l'emprendissadi d'emploiada da service ed ha dapi lura adina lavurà en la gastronomia. Suenter ch'ella ha manà l'ustaria d'autostrada Heidiland, ha ella tschertgà avant dus onns ina nova sfida. Durant quest temp ha ella lavurà tar ses geniturs en l'ustaria Parlatsch. Uschia è ella era vegnida sin l'idea da cumprar l'ustaria. "I duai restar vinavant ina tipica ustaria grischuna" Petra Kreilos na vul betg far memia grondas midadas. "I duai restar vinavant ina tipica ustaria grischuna cun tipicas tratgas grischunas", punctuescha Petra Kreilos. Suenter Pasca surpiglia ella il manaschi e spera da pudair avrir l'ustaria duas emnas pli tard. (rtr/gh/fa)