Gigants – tschintg plantas monumentalas en il Grischun

Mintgatant na vesan ins betg pli il guaud pervia da las plantas. Ma quai di be il proverbi. En ses film davart gigants cun ragisch mussa Arnold Rauch las plantas, pli precis singulas plantas gigantas, nunconfundiblas, monumentalas, plantas ch'ì na dà nagliur auter! Da vesair, anzi da contemplar ed admirar èn: in pign, il pli aut da la Svizra, in fau sco in taur, in chastagner rar, rarischem, in fraissen starmentus ed in schember vegl antic, forsa il pli vegl dal mund. Mintgin dals tschintg gigants ha sia istorgia, ha sia fisionomia, anzi è ina persunalitad, in unicum, e quai era sche els na bandunan betg il lieu nua ch'els han cumenzà a crescher avant tschientaners.