Primavaira per davaira - propi?

Mardi, ils 20 da mars ha la primavaira cumenzà. Gnanc da crair, perquai ch'en grondas parts dal Grischun datti anc naiv en abundanza. E tuttina: Mussa la primavaira gia segns da vita? Sa lascha ella gia udir, sentir e vesair? Radiotelevisiun Svizra Rumantscha èn ids en tschertga da suns e tuns primavairils.

En la bassa èsi gia primavaira enfin ch'il Calanda è anc cuvert cun naiv Bild in Lightbox öffnen.

Legenda da maletgs: En la bassa èsi gia primavaira enfin ch'il Calanda è anc cuvert cun naiv Keystone

Prest rullan las fullas da töfs

Prest cumenza puspè la stagiun da töfs. Bild in Lightbox öffnen.

Legenda da maletgs: Prest cumenza puspè la stagiun da töfs. RTR, S. Derungs

Strusch ch'i vegn pli chaud, ston ins era quintar cun ils motociclists. En curt vegn in pass suenter l'auter avert e las fullas da töfs sa movan puspè en noss chantun. Èn els insumma bainvegnids en il Grischun, giogan els perfin ina rolla per il turissem da stad? E co tracta la polizia ils motociclists? Il cusseglier guvernativ Christian Rathgeb è sez in motociclist; el dat pled e fatg co ch'il Grischun sa prepara per la stagiun da töfs.

Tendenzas per las vacanzas da stad

Daytona Beach en ils Stadis Unids da l'America Bild in Lightbox öffnen.

Legenda da maletgs: Daytona Beach en ils Stadis Unids da l'America Keystone

Las vacanzas da stad, quellas èn d'ina vart anc lunsch davent, dentant da l'autra vart vegnan ellas adina pli datiers. Plaunet èsi da studegiar nua ch'ins vuless ir en vacanzas. L'offerta è enorma, e mintg'onn datti trends, destinaziuns u modas da far vacanzas. Claudia Cathomen sa nua ch'ils Grischuns e las Grischunas van questa stad en vacanzas.

La primavaira e la musica

Giudair musica da primavaira Bild in Lightbox öffnen.

Legenda da maletgs: Giudair musica da primavaira Keystone

La chanzun "Maledetta Primavera" chantada da Loretta Goggi, ina chanzun adattada perfetgamain a la stagiun actuala. Oz discurrin nus sur da la primavaira e la musica. La primavaira e la musica, è quai ina colliaziun perfecta? E tar tge sparta da musica ha la primavaira la pli gronda preschientscha? Respostas dat Jachen Prevost, il responsabel da musica tar Radiotelevisiun Svizra Rumantscha.

2 milliuns pateschan d'allergias

La stagiun dals pollen cumenza cun l'entschatta da la primavaira. Bild in Lightbox öffnen.

Legenda da maletgs: La stagiun dals pollen cumenza cun l'entschatta da la primavaira. Keystone

En Svizra pateschan radund dus milliuns persunas d'ina allergia. Perquai, e cun chaschun dal di mundial d'allergias ha il center Svizzer d'allergias "aha" organisà in post d'infurmaziun sin plazza federala. Quai cun la finamira da sensibilisar il pievel per allergias. Las pli derasadas èn l'allergia da pollen ed asma ch'i dat savens gia tar uffants. Tema central dal di d'acziun è il tema allergias en connex cun sport. Tenor Judith Alder dal center Svizzer d'allergias han blers il sentiment che allergias e sport na sa cumportian betg. Il cuntrari saja dentant il cas. Far sport saja era fitg impurtant per persunas cun allergias. Impurtant saja dentant che l'allergia saja sut controlla.

Sut la cuverta da naiv sa sveglia la natira plaunet

Sut la cuverta da naiv sa sveglia la natira plaunet Bild in Lightbox öffnen.

Legenda da maletgs: Sut la cuverta da naiv sa sveglia la natira plaunet Keystone

En las regiuns muntagnardas na ves'ins il mument bain anc betg bler da la primavaira. La cuntrada è per la gronda part anc alva. Tut para da durmir. E tuttina sa sveglia la natira zitg a zitg. Nus avain dà in sguard en l'Engiadina anc alva; quai era sut la cozza da naiv?

Quant ferm regna la primavaira gia en noss conturns?

Tar las butias ha la primavaira gia cumenzà. Bild in Lightbox öffnen.

Legenda da maletgs: Tar las butias ha la primavaira gia cumenzà. RTR, P. Collet

Entschet ha ella - la primavaira. Almain uffizialmain. Sch'ins guarda ora en la cuntrada dominescha dentant anc l'enviern: naiv, naiv ed anc ina giada naiv - nua ch'ins guarda. Perquai n'èn ils sentiments da primavaira era betg anc avant maun tar ils blers. L'emprim sto la naiv svanir, lura vegnan ils sentiments primavauns lura - uschia il tenor. E tuttina, en pliras butias ha la primavaira gia entschet. Da cumprar datti fluras en tuttas colurs, plantinas, rauba da decoraziun e bler auter. E la clientella sa mussa per part gia motivada per far cumpras da primavaira.

Nua va la naiv che lieua?

La naiv lieua. Bild in Lightbox öffnen.

Legenda da maletgs: La naiv lieua. pixelio.de

Sa regurdais anc da la fradaglia? Ed ussa èsi il cuntrari: empernaivlas temperaturas da primavaira. Punctualmain cun il Chalandamarz ha il sulegl cumenzà da laschar luar la naiv. Ma nua culla tut quest'aua, sche la naiv sparescha ed ils mantuns da naiv daventan pli pitschens?