Elecziuns-2011

Svizra: Verd-liberals e PBD gudognan

Ils resultads da las elecziuns naziunalas èn ussa uffizials. Cun in minus dad 8 sezs è la Partida populara svizra (PPS) la partida che perda ils blers sezs tar questas elecziuns. Ella resta dentant cun 54 mandats la pli ferma partida en il cussegl naziunal.

Cussegl naziunal: Gasser remplazza Caviezel

UPDATE 19.05: Enstagl da Tarzisius Caviezel (PLD) ha il suveran grischun elegì il verd-liberal Josias Gasser en il cussegl naziunal. Gasser ha survegnì 16'123 vuschs. Il terz meglier resultat.

Cussegl dals chantuns: Engler e Schmid èn elegids cun resultats istorics

Senza tensiun, ma cun in resultat istoric. Uschia è l'elecziun en il cussegl dals chantuns sa splegada en il Grischun. Ils dus sulets candidats uffizials, Stefan Engler (PCD) e Martin Schmid (PLD) èn vegnids elegids cun in dumber da vuschs sco mai pli dapi il 1998. Engler ha cuntanschì 37'454 vuschs, Schmid 31'224 vuschs. Il pli absolut è stà tar 19'748 vuschs. 40,03% da las votantas e dals votants grischuns èn stads a l'urna. Il 1998 aveva Christoffel Brändli (PPS) cuntanschì bun 29'400 vuschs. Engler e Schmid remplazzan Christoffel Brändli (PPS) e Theo Maissen (PCD). Quai vul dir, che la PPS perda ses sez en la chombra pitschna. L'actual directur da finanzas dal Grischun, Martin Schmid, terminescha uschia per ils liberaldemocrats ina perioda da passa 75 onns senza esser stà represchentà en il cussegl dals chantuns. Il davos cusseglier dals chantuns da la PLD è stà Andreas Laely da Tavau (1913 – 1935). Il successur da Martin Schmid en la regenza grischuna vegn elegì ils 29 da schaner dal 2012. (ec)

Barometer-elecziuns-2011

Per las elecziuns dal parlament da l'atun 2011 lascha la SRG SSR far 7 giadas in barometer d'elecziuns. Quel duai mussar tendenzas tge partidas che vegnan a gudagnar u a sperder sezs en il parlament a Berna. Las retschertgas e l'elavuraziun da las datas vegnan fatgas da GfS

Barometer-d-elecziuns-grischun

Sche las elecziuns fissan stadas la dumengia passada, avessi lura dà midadas? Po la Partida burgais-democratica PBD salvar ses 2 mandats en il cussegl naziunal u cuntanscha la Partida populara (PPS) dus? Quai tar las emprimas elecziuns suenter la separaziun da PPS e PBD? Co vesi ora tar las autras partidas en il Grischun? Radiotelevisiun Svizra Rumantscha e la Südostschweiz han incumbensà l'institut da perscrutaziun DemoSCOPE da far la retschertga, tgenina partida che Grischunas e Grischuns avessan elegì, sche las elecziun fissan stadas ils 2 d'october. Ils trends da questa retschertga datti qua sut.

Las glistas da candidatAs per il cussegl naziunal

Per l'emprima giada ha la sort decidì tge partida che survegn tge numer da glista per las elecziuns dal Cussegl naziunal. Fin uss ha la chanzlia chantunala survegnì 14 glistas per las elecziuns dals 23 d'october. Ils 24 da matg ha la chanzlia tratg la sort per la successiun da las glistas.

Plazza federala a Berna – lieu da sentupada per la Svizra

Dals 19 fin ils 30 da settember 2011 è la plazza federala a Berna sa midada en in grond studio da radio e televisiun. La SRG SSR ha envidà populaziun e politichers ed ha realisà emissiuns directas da la Plazza federala. Ils 19 ed ils 29 da settember 2011 è era il Telesguard da Radiotelevisiun Svizra Rumantscha vegnì emess direct da Berna. RTR ha preschentà politichers grischuns che candideschan per il parlament federal ed ha discutà cun experts. En il center dals discurs è stà la politica da giuventetgna, la politica da seniors dentant era dumondas d'integraziun e cultura. Ils 22 ed ils 29 da settember 2011 ha il Radio Rumantsch emess live da Berna discurs cun ils parlamentaris grischuns partents.

Crusch e travers tras la Svizra ed il Grischun

Tge occupescha la populaziun svizra in pèr emnas avant las elecziuns federalas dals 23 d'october? Tge quitads e tge giavischs ha ella? La Televisiun Rumantscha ha fatg in viadi tras la Surselva en l'Engiadina, da la Stussavgia enfin en la Val Bregaglia per chattar ils temas che preoccupan la populaziun dal Grischun. Il Radio Rumantsch ha vulì tutgar il puls da las Svizras e dals Svizzers ed ha fatg in viadi da Genevra al Lai da Constanza - via il Giura, il Vallais, l'Argovia ed il chantun Turitg.

FitTA per Berna?

Dals 26 da settember fin ils 1 d'october 2011, mintgamai las 08.15 ha inA candidatA per il cussegl naziunal mussà schebain elLA è "FitTA per Berna". Da 10 dumondas sur da politica, partidas e patria han elLAs stuì savair almain 8 per obtegnair il predicat "FitTA per Berna". Per ina giada n'han els betg pudì discurrer sur da lur qualitads, mabain han propi stuì demussar tge ch'els ed ellas san. Ils suandants candidats e candidatas èn sa mess a disposiziun:

Candidatas e candidats duelleschan

Tge politica d'energia duai la Svizra avair, co duai la Svizra ir enturn cun l'immigraziun, co duai Berna schliar ils problems da regiuns periferas? Quellas ed autras dumondas han noss schurnalists fatg a mintgamai 2 candidatAs en ina mini-debatta.

La prova

Ils politichers chattan bels pleds cura ch'els discurran da la teoria. Perquai ha il Telesguard confruntà politichers cun la realitad. Tge opiniuns han ils candidats e las candidatas en secturs ch'els n'èn betg experts. Sco parlamentarias e parlamentaris potenzials a Berna ston els esser abels, d'avair in'opiniun e sche pussaivel era soluziuns per schliar problems existents.

Da scandals ed empermischuns - il sguard satiric sin las elecziuns federalas

Tge scandals pudessan periclitar l'elecziun da candidatas e candidats, tge empermischuns fan ellas per vegnir elegidas, tgi ha insumma la survista da tuttas glistas e tuts candidats e tgi patratga suenter l'elecziun vid quels che han gì naginas schanzas: Arno Camenisch cun ses sguard satiric sin las elecziuns dal october.

Las partidas, lur istorgia e las schanzas

Quant bain enconuschan ils Grischuns las partidas, tge istorgia han las partidas grischunas, tgi èn las candidatas ed ils candidats, tge munta la colur en il logo da la partida e tge schanzas dattan l'astrologa e l'observatur da la politica a las partidas? Il Radio Rumantsch preschenta las partidas che vulessan trametter ina delegaziun a Berna.

Candidats per il cussegl dals chantuns

Per il cussegl dals chantuns na datti nagin cumbat electoral en il chantun Grischun. Ils dus cussegliers ch'han represchentà fin ussa il Grischun en il cussegl dals chantuns, Theo Maissen (PCD) e Christoffel Brändli (PPS) han demissiunà. Per els dus datti mo dus candidats.

Discussiuns davart las elecziuns 2011

Las elecziuns 2011 furneschan temas da discussiun. En las discussiuns da Radiotelevisiun Svizra Rumantsch discuteschan persunas da la politica adina puspè davart las elecziuns dal parlament federal.

Ulteriuras emissiuns

Las elecziuns èn era tema en emissiuns ch'han betg per tut pretsch da far insatgè cun novitads e politica.