Ernst Bromeis retschaiva il premi da la SRG.R 2012

Ernst Bromeis, ambassadur d'aua/nudader extrem e ses "MIRACUL BLAU", quai è in'instoriga da success, in'istorgia ch'includa differents elements: il sport, la natira, l'ecologia, il spazi alpin. Quai ch'ha cumenzà sco in'aventura sportiva è daventà in vair program multifar, ina performance ch'ha survegnì ina publicitad naziunala. La SRG SSR Svizra Rumantscha sco societad purtadra da RTR Radiotelevisiun Svizra Rumantscha distingua Ernst Bromeis cun il premi 2012.

Ernst Bromeis, miracul blau. Bild in Lightbox öffnen.

Legenda da maletgs: Ernst Bromeis, miracul blau. Andrea Badrutt

Onn per onn surdat la societad purtadra SRG SSR Svizra Rumantscha in premi dotà cun 8000 francs. Quest premi va a persunalitads u ad instituziuns ed organisaziuns ch'èn sa distinguidas a moda particulara sin in champ spezial. Quest onn retschaiva Ernst Bromeis il premi. Il premi vegn surdà a chaschun da la radunanza generala da la SRG.R ils 2 da zercladur 2012 a Scuol. La suprastanza da la SRG.R, timunada da Duri Bezzola, surdat 2012 il premi ad Ernst Bromeis per la prestaziun innovativa sco performer sportiv, cultural ed ecologic. Cun ses project "Il miracul blau" renda el attent la publicitad ad ina resursa primara, numnadamain l'aua. Cunquai metta el l'aua en in context cultural e fa conscient quant impurtant ch'i è da dar tut quità a questa funtauna primara da l'umanitad insumma. Ernst Bromeis sa definescha sasez sco ina sort "um da l'aua", ma era sco ambassadur da l'aua, sco aventurier e musicist. Suenter avair acquistà la patenta da scolast primar ha el fatg il studi da scolast da sport a l'universitad da Basilea e s'ha spezialisà tar Swiss Olympic sco trenader per sport d'elita. El è stà engaschà en differentas scharschas da marketing e schurnalissem, uschia era durant intgins onns sco redactur dal Radio Rumantsch. Dapi 2008 lavura el sur sasez cun sia firma "heja". Renum naziunal ha el acquistà la stad 2008 cun ses project "Grischun - Il miracul blau". Ordlonder èn naschids ulteriurs projects ch'han da far cun l'aua. El sez ha traversà tut ils lais dal Grischun ed ils lais gronds da mintga chantun da la Svizra sco nudader ed ussa vul el ir da la funtauna dal Rain fin a la sbucca da quest flum europeic en la mar dal Nord.