Haiti prest dus onns suenter la catastrofa

Prest dus onns suenter il grev terratrembel a Haiti ha la Chadaina da Fortuna envidà schurnalistas e schurnalists da far in viadi a Haiti per guardar tge che las donaziuns ch'èn vegnidas fatgas a la Chadaina da Fortuna han effectuà. Al viadi è era la responsabla per la Chadaina da Fortuna dal Radio Rumantsch, Claudia Cathomen sa participada. Ils 12 da schaner 2010 ha in grev terratrembel destruì grondas parts dal pajais. Passa 300'000 persunas han pers la vita. La Chadaina da Fortuna ha rimnà ils 21 da schaner 2010 per las unfrendas da questa catastrofa. La centrala a Cuira ha rimnà 927'000 francs. Cun quels daners sustegna la Chadaina da Fortuna autras organisaziuns che gidan en ils territoris da catastrofa. Vegnan quels daners en il lieu e tge è la finala vegnì fatg cun quels? Per respunder quellas dumondas organisescha la Chadaina da Fortuna da temp en temp viadis per schurnalists en ils pajais ch'han survegnì sustegn finanzial.

Rapports da Haiti

Claudia Cathomen ch'è responsabla per la Chadaina da Fortuna ha fatg il viadi ensemen cun auters schurnalists e persunas da la Chadaina da Fortuna a Haiti. Dals 15 fin ils 19 da november ha ella rapportà da la situaziun a Haiti e da l'agid ch'è vegnì pussibilità entras las donaziuns da svizras e svizzers. Fotografias da Haiti e discurs cun persunas pertutgadas pudais tadar e guardar sin questa pagina.

66 milliuns francs per Haiti

Gievgia, ils 21 da schaner 2010, ha la Chadaina da Fortuna organisà in di naziunal da rimnar daners en l'entira Svizra. Fin mesanotg ha l'acziun naziunala cuntanschì la summa da 20'828'008 milliuns francs.

Il terratrembel

Il terratrembel dal schaner 2010 a Haiti ha custà la vita a passa 300'000 persunas ed ha destruì ils abitadis da prest 2 milliuns persunas.

(gh)