Sustegn per "Las-Alps-infoteca" - finanziaziun anc averta

Passa 100 persunas da la regiun alpina han discutà venderdi e sonda en il bajetg dal parlament a Cuira, sch'ina chasa da medias da las Alps saja giavischada. La finamira saja auta, ussa saja quai da sa stentar che questa visiun vegnia sustegnida, è il facit.

Eveline Widmer-Schlumpf, Ruedi Bruderer e Mariano Tschuor. Bild in Lightbox öffnen.

Legenda da maletgs: Eveline Widmer-Schlumpf, Ruedi Bruderer e Mariano Tschuor. RTR

Duri Bezzola, l'anteriur cusseglier naziunal e president da la SRG.R ed il directur da RTR Mariano Tschuor èn cuntents cun la dieta. L'idea da "Las-Alps-infoteca" per colliar il spazi cuminaivel da vita e lavur cun la tecnologia, e da daventar l'emprima adressa per intermediar cuntegns schurnalistics sur da las Alps saja ina gronda ed impurtanta incumbensa. Tar ils proxims pass tutgan uss ina giada dad evaluar ils resultats da la dieta, dals lavuratoris ch'èn vegnids fatgs oz. Silsuenter vul Mariano Tschuor udir anc ina giada da las differentas persunas e differentas organisaziuns schebain lur decleranzas positivas dad oz tegnan vinavant ed han era cuntinuitad. E lura dovri era daners per finanziar ina fasa da svilup. Per vegnir in pass vinavant dovri in mez milliun euros, la summa ch'è budgetada per pudair sviluppar e bajegiar si Las-Alps-infoteca. Dus onns èn previs per sviluppar e crear Las-Alps-infoteca. Plinavant duair vegnir installada ina gruppa da lavur che sa fatschenta cun l'organisaziun concreta d'in managment da project. A la dieta n'ha anc nagin pudì dar il consentiment per ina finanziaziun. Las participantas ed ils participants a la dieta Las-Alps-infoteca a Cuira èn vegnids da Klagenfurt, Gröden, Bregenz, la Vuclina, dal Piemunt, Lyon ma er da l'entira Svizra e da numerus auters lieus da las Alps. Represchentadas eran las grondas chasas da medias sco ZDF, ORF, il Bayerischer Rundfunk, RAI, Euronews, la Südostschweiz Medien; igl era glieud da la CIPRA, dal club alpin talian e svizzer, da la rait da vischnancas en las Alps, plinavant emploiads dal chantun Grischun, Tirol dal Sid, Voralberg e da la confederaziun, ma er represchentants d'organisaziuns culturalas e d'universitads da differents pajais en las Alps. Las-Alps-infoteca duai meglierar la collavuraziun transcunfinala da las medias. Las-Alps-infoteca vul esser ina plattafurma d'infurmaziun da las Alps, in center per intermediar infurmaziuns davart il territori alpin. L'intent è da stgaffir ils proxims onns a Cuira in center da cumpetenza per las medias en las Alps. Sin la foto: Cussegliera federala Eveline Widmer-Schlumpf, il manader da project Ruedi Bruderer ed il directur da RTR Mariano Tschuor