Secrets enconuschents - u tuttina betg?

I sa chattan en la grippa, zuppadas uschia ch'ins las vesa gnanc. Mo magari sa paschentani era sco chasas u stallas. En vardad èni dentant insatge tut auter. Manegià èn las fortezzas dal militar. Construidas per defender la Svizra ed oz per il pli mo pli relicts da temps passads che vegnan plaun a plaun puspè destruids u sbalunan.

In film sur da las catacumbas militaras dal ventgavel tschientaner

Il Grischun sutterran
Bild in Lightbox öffnen.

Legenda da maletgs: Il Grischun sutterran RTR

Sa retrair en las muntognas e cumbatter l'inimi ora da las foras! Quai era la strategia militara da la segunda guerra mundiala. L'armada fascheva quint cun attatgas dal nord (Hitler) e dal sid (Mussolini). Tranter l'onn 1936 e 1941 s'ha la Svizra fortifitgà da moda massiva. Las muntognas èn perfuradas dapertut, cunzunt en il Grischun. Suenter la guerra mundiala han ins mantegnì tut questas ovras fin 1995. Pir alura ha l'armada midà sia strategia. Ma er oz anc èn las bleras fortezzas nunenconuschentas a la populaziun. En ses film "Il Grischun sutterran" entra Arnold Rauch en catacumbas militaras mantegnidas e ruinadas, en lieus conuschents e lieus zuppads ed emblidads.

Reminiscenzas or da las fortezzas

Venanzi Wenzin da Mustér ha lavurà 37 (1963-2000) onns en fortezzas sisum la Surselva ed en il conturn d'Ursera (Andermatt), sco appuntà (Gefreiter) dal corp da guardiafortezzas. Bleras fortezzas devi gia, autras èn anc vegnidas bajegiadas da nov. Quellas avevan gruppas da mantegniment dal corp da guardiafortezzas da mantegnair. Venanzi Wenzin èra ina da quellas persunas che gieva da fortezza tar fortezza per far lavurs da mantegniment sco pictur. Ed el ha laschà reviver quai temp.

Fortezzas tar RTR

Fortezzas èn gia bain inqual giada stadas tema tar RTR. Qua chattais intginas contribuziuns davart fortezzas.

(gh)