Europeada 2008

La festa da ballape da las minoritads En terra rumantscha ha il campiunadi europeic da ballape gia cumenzà in'emna pli baud. Da l'emprim enfin ils 7 da zercladur ha gì lieu en Surselva ed a Cuira l'Europeada 2008, la festa da ballape da las minoritads linguisticas europeicas.

Europeada 2008 Bild in Lightbox öffnen.

Legenda da maletgs: Europeada 2008 RTR

Europeada: ils Sidtirolais han gudagnà

Europeada: Sidtirolais han gudagnà Bild in Lightbox öffnen.

Legenda da maletgs: Europeada: Sidtirolais han gudagnà RTR

L'Europeada, il turnier da ballapè da minoritads linguisticas è ì a fin oz suentermezdi a Cuira. En il final han ils Croats da la Serbia giugà cunter ils Sidtirolais. Gudagnà il gieu han ils Sidtirolais cun 1:0. En il gieu per il terz plaz han ils Roma en Ungaria battì ils Danais en Germania cun 9:0. Per l'organisaziun da l'Europeada hai dà laud, dentant er bler critica. Gion Schwarz, il president dal comité d'organisaziun tira bilantscha.

L'Europeada è a fin per la squadra dals Rumantschs

Ils Rumantschs Bild in Lightbox öffnen.

Legenda da maletgs: Ils Rumantschs RTR

Il campiunadi da ballape da las minoritads linguisticas da l'Europa, l'Europeada 2008 è a fin per la squadra dals Rumantschs. Els han pers ier saira la partida dal quart final cunter ils Roma da l'Ungaria cun 1:5.

Europeada: inscunter da crisa a Mustér

Europeada 2008 Bild in Lightbox öffnen.

Legenda da maletgs: Europeada 2008 europeada2008.net

Ils Aromuns na pon betg dar ils quarts finals da l'Europeada, quai malgrà ch'els han pli blers puncts ch'ils Danais en Germania. La raschun è quella ch'ils organisaturs da l'Europeada quintan era la statistica da fair-play, pia las chartas melnas e cotschnas, per guardar tgi che vegn en la proxima runda. Suenter ch'ils Aromuns da la Rumenia han protestà tar ils organisaturs cunter la decisiun da midar las reglas dal turnier, hai dà a Mustér in inscunter tranter ils participants.

Tar l'Europeada valan autras reglas

Arbiter Bild in Lightbox öffnen.

Legenda da maletgs: Arbiter RTR

La minoritad dals Aromuns da la Rumenia bandunan l'Europeada suenter ch'els na pon betg giugar il quart final. Cunter lur disqualificaziun protestan ils Aromuns tar ils organisaturs. Tar l'Europeada vegn quintà auter che tar gieus da ballape normals, er il fair-play ha influenza sin ina qualificaziun.

Prevista sin il gieu dal quart final tranter ils Roma da l'Ungaria cunter ils Rumantschs

Eros Bonolini, l'emprim trenader naziunal da la Rumantschia Bild in Lightbox öffnen.

Legenda da maletgs: Eros Bonolini, l'emprim trenader naziunal da la Rumantschia RTR

Questa saira stattan ils quart finals sin il program. L'equipa Rumantscha dat cunter ils Roma da l'Ungaria. Il trenader dals Rumantschs, Eros Bonolini è optimistic.

La communicaziun tranter las minoritads funcziuna

Ina da las finamiras da l'Europeada 2008 è cuntanschida, la communicaziun tranter las minoritads funcziuna. Quai è sa mussà ier saira a Tavanasa durant il gieu dals Rumantschs cunter ils Catalans. Il commentatur dal gieu Gabriel Derungs ha intervistà il schef dals Occitans Péire Costa per rumantsch.

Festa culturala da l'Europeada

Il punct culminant cultural da l'Europeada 2008 è passà. Oz è stà di da festa a Milez en Tujetsch. Differentas minoritads linguisticas èn sa preschentadas cun saut e chant.

Bilantscha intermediara da l'Europeada cun Patric Collet

Patric Collet Bild in Lightbox öffnen.

Legenda da maletgs: Patric Collet RTR

Patric Collet è in dals arbiters da l'Europeada. El è da Riom ed ha gist finì ses studi a la HTW e tschivla er anc partidas da l'emprima liga. Sche tut va sco previs, lura tschivla el il final da l'Europeada che ha lieu sonda a Cuira. Patric Collet fa ina bilantscha da l'Europeada suenter circa la mesadad dal turnier.

Inqual equipa crititgescha la dimora durant l'Europeada

Chombra senza fanestra (maletg da simbol) Bild in Lightbox öffnen.

Legenda da maletgs: Chombra senza fanestra (maletg da simbol) Pixelio.de

La mesadad da l'Europeada, il turnier da ballape da las minoritads linguisticas da l'Europa è a fin. Damaun vegnan ils quart finals giugads. Oz è di da festa. Ina festa culturala si Milez a Sedrun. Per l'Europeada racoltan ils responsabels bler laud, mo i dat er critica, critica pertutgant la dimora. Inqual minoritad linguistica avess spetgà dapli confort d'ina terra bainstanta sco la Svizra. Il Radio Rumantsch ha confruntà il pledader da l'Europeada Andrea Rassel cun quella critica.

Europeada: l'organisaziun dals arbiters na cuntenta betg tuts

Arbiter Bild in Lightbox öffnen.

Legenda da maletgs: Arbiter RTR

Per l'equipa rumantscha va tut sco giavischà tar l'Europeada, ils emprims dus gieus han els gudagnà. Dentant betg sco giavischà è per inqual equipa da l'Europeada l'organisaziun dals arbiters. Durant la fasa da gruppa datti mo in arbiter, quel sin il plaz e nagins assistents sin lingia. È quai propi in problem? Il Radio Rumantsch ha discurrì cun Patric Collet, in dals arbiters da l'Europeada.

Datti ina proxima Europeada?

Europeada 2008 Bild in Lightbox öffnen.

Legenda da maletgs: Europeada 2008 europeada2008.net

L'Europeada ch'è il mument en Surselva na duai betg avair lieu mo ina giada. En dus onns duessi puspè dar in turnier da ballape da las minoritads linguisticas. La federaziun da las minoritads linguisticas è a la tschertga d'organisaturs.

A la tschertga d'experts

Pli probabel datti nagliur tants experts sco tar il ballape. Quai n'è betg auter tar l'Europeada 2008. Ier saira han las squadras giugà otg gieus. Pia otg pussaivladads per ils experts da mussar lur conuschientschas. Il Radio Rumantsch è stà al gieu dals Rumantschs cunter ils Valis ed ha tschertgà durant la pausa experts per laschar commentar il gieu.

L'Europeada ha cumenzà

Impressiun da la festa d'avertura da l'Europeada a Mustér Bild in Lightbox öffnen.

Legenda da maletgs: Impressiun da la festa d'avertura da l'Europeada a Mustér RTR, Alexi Monn

L'Europeada 2008 - il campiunadi da ballape da minoritads linguisticas da l'Europa è averta uffizialmain dapi ier saira. En ina festa d'avertura a Mustér han ils organisaturs preschentà las squadras participantas da l'Europeada 2008. Oz cumenzan ils gieus da gruppa. Il final ha lieu sonda proxima a Cuira.

Gabriel Derungs - il leader da l'equipa rumantscha

Gabriel Derungs Bild in Lightbox öffnen.

Legenda da maletgs: Gabriel Derungs chur97.ch

Questa saira è l'avertura da l'Europeada 2008. Frei, Barnetta, Inler u Behrami, quai pudessan esser ils stars svizzers a l'EURO 2008. A l'Europeada che cumenza damaun sin differents plazs da ballape da la Surselva dattan nagins stars. Mo er al campiunadi d'Europa da las minoritads vegni a dar intgins giugaders-clav. En l'equipa rumantscha pudess il lumnezian Gabriel Derungs esser in da quels. Fertant ch'ils blers giugaders da l'equipa rumantscha dattan en la 3. e 4. liga, dat Gabriel Derungs cun Cuira 97 en la 2. liga interregiunala. Il giugader da mez è predestinà d'esser in dals leaders en l'equipa rumantscha.

Prevista sin l'Europeada 2008 - visita tar il prim trenament da la squadra rumantscha

Europeada 2008 Bild in Lightbox öffnen.

Legenda da maletgs: Europeada 2008 RTR

L'euforia da ballape cumenza plaunsieu a crescher. Oz en in'emna cumenza l'EURO 2008 en Svizra ed en l'Austria. Gia damaun cumenza in auter turnier da ballape. Quai è l'Europeada 2008, il campiunadi da ballape per minoritads linguisticas. Part a l'Europeada fa er ina squadra rumantscha. Quella ha trenà ier saira per l'emprima giada ensemen. Nus avain visità ils giugaders e trenader. La squadra rumantscha dat ses prim gieu damaun suentermezdi da las 17:00 a Trun cunter la minoritad tudestga che viva en l'Ungaria.

Nov plan per l'Europeada 2008

Las squadras da ballape da las minoritads ston giugar l'emna che vegn senza ils Aromuns da la Macedonia a l'Europeada 2008. Quests na pon betg vegnir en Surselva perquai ch'els n'han betg survegnì ils visums necessaris.

Eros Bonolini - l'emprim trenader naziunal da la Rumantschia

Eros Bonolini, l'emprim trenader naziunal da la Rumantschia Bild in Lightbox öffnen.

Legenda da maletgs: Eros Bonolini, l'emprim trenader naziunal da la Rumantschia RTR

Per l'emprima giada en l'istorgia ha la Rumantschia in'equipa naziunala da ballape, igl è l'equipa rumantscha che dat a l'Europeada, il campiunadi europeic da las minoritads linguisticas. L'Europeada cumenza gia in'emna avant l'EURO 2008. 18 equipas da l'entira Europa dattan en differents lieus da la Surselva. Il final è lura a Cuira, quai sonda, ils 7 da zercladur, paucas uras avant che la vaira EURO 2008 cumenza a Basilea. Oz han ils organisaturs preschentà a Cuira il program e cun questa chaschun er gist intgins giugaders da l'equipa rumantscha, inclusiv il trenader Eros Bonolini da Schluein. Nus avain discurrì cun Eros Bonolini che dastga sa numnar emprim trenader naziunal da la Rumantschia.

Preschentaziun dal program dal turnier Europeada 2008

Ballape Bild in Lightbox öffnen.

Legenda da maletgs: Ballape Pixelio.de

L'organisaziun da l'Europeada 2008 è sin curs. Ils organisaturs dal campiunadi da ballape da las minoritads europeicas han preschentà oz il program dal turnier. Era l'equipa rumantscha è vegnida preschentada per l'emprima giada. Da la partida èn tranter auter Renzo Blumenthal dal CB Lumnezia, Gabriel Derungs da Cuira97 u er Marius Zarn dal FC Vaduz. Sper il turnier da ballape datti era in di da cultura a Sedrun-Milez cun musica indigena e nua ch'era las minoritads europeicas sa preschentan.

Sin la tschertga da voluntaris per l'Europeada 2008

Logo da l'Europeada 2008 Bild in Lightbox öffnen.

Legenda da maletgs: Logo da l'Europeada 2008 RTR

Anc in mais e mez e lura cumenza l'Europeada 2008, il campiunadi da ballape per las minoritads linguisticas da l'Europa. Durant in'emna vegni dà ballape davent da Cuira fin si Sedrun. 20 equipas cumbattan per il titel da campiun da las minoritads. Per ch'i dettia ina festa da ballape, na tanschi betg be cun quels che cumbattan sin las plazzas da ballape. I dovra er quels davos las culissas, quels che sa gidan. Per che l'Europeada gartegia, èn ils organisaturs a la tschertga da voluntaris.

Ils Ladins crititgeschan ils organisaturs da l'Europeada 2008

Logo da l'Europeada e giugaders da ballape Bild in Lightbox öffnen.

Legenda da maletgs: Logo da l'Europeada e giugaders da ballape swissinfo.org

L'Europeada 2008, il campiunadi europeic da minoritads linguisticas procura per irritaziuns en il Tirol dal Sid. Ils plans da quai campiunadi, che na duai betg mo daventar ina festa da ballape, mabain er ina festa per las minoritads linguisticas na fa fin uss anc betg plaschair a tuts. Nus rapportain davart las correcturas che la Lia Rumantscha ha stuì far.

Las spetgas da l'Europeada 2008

Da sanester: Andrea Rassel e Gion Schwarz Bild in Lightbox öffnen.

Legenda da maletgs: Da sanester: Andrea Rassel e Gion Schwarz RTR

L'entschatta zercladur, gist avant che l'EURO 2008 cumenza s'entaupan 20 equipas da ballape da las minoritads europeicas en Surselva. 37 gieus da ballape e blers inscunters culturals, quai è l'Europeada 2008, organisada da la Lia Rumantscha, da la FUEN, l'uniun federala da las naziunalitads europeanas e da Sedrun Mustér Turissem. 20 equipas da minoritads da 12 terras vulan eruir il campiun europeic da ballape da las minoritads.

Preschentaziun da las equipas da l'Europeada 2008

Trair la sort tranter las equipas da ballape da l'Europeada 2008 Bild in Lightbox öffnen.

Legenda da maletgs: Trair la sort tranter las equipas da ballape da l'Europeada 2008 TvR

L'Europeada 2008, l'emna avant che l'EURO 2008 cumenza beneventa il Grischun 20 equipas al campiunadi da ballape per minoritads. Oz èn las equipas vegnidas preschentadas ed igl è vegnì tratg la sort en preschientscha da Christoffel Brändli, il president dal cussegl dals chantuns. L'Europeada 2008 ha lieu dals 31 da matg enfin ils 7 da zercladur en la Surselva ed a Cuira.

Europeada 2008: dapli annunzias che previs

Ballape Bild in Lightbox öffnen.

Legenda da maletgs: Ballape Pixelio.de

Quest onn n'ha betg be lieu l'Euro 2008, mabain er l'Europeada 2008. L'Europeada è in turnier da ballape per minoritads linguisticas. Quest turnier ha lieu en Surselva. Il turnier vegn a dar in pli grond arranschament che planisà.