Cronologia-da-la-catastrofa

Mesemna, ils 04 matg 2011

Radioactivitad da l'aua è puspè creschida La radioactivitad da l'aua da la mar avant l'ovra atomara da Fukushima è creschida massivamain. Quai ha il gestiunari da l'ovra, la Tepco, communitgà suenter avair analisà provas 15 kilometers avant l'ovra atomara. La quantitad dal cesium radioactiv saja 600 giadas pli auta che normal. Er la quantitad dal jod radioactiv saja s'augmentà. Per quant n'ha ella betg ditg. (fb/sda)

Mesemna, ils 20 d'avrigl 2011

La zona enturn Fukushima vegn probabel bloccada En il Giapun vegn probablamain bloccada la zona enturn l'ovr'atomara da Fukuschima. Tenor la regenza giapunaisa vegn discutà il scumond cun las autoritads localas. Il territori da 20 km enturn l'ovra duai vegnir declerà sco zona da privel. Ins vul impedir ch'evacuads turnan en lur chasas e donnegian lur sanadad. Avant la catastrofa eran da chasa 75'000 persunas en quella zona.

Mardi, ils 19 d'avrigl 2011

La regenza dal Giapun na quinta betg ch'i vegnia uschè lunsch ch'il coc da l'ovra atomara donnegiada a Fukushima lieuia dal tut.

Glindesdi, ils 18 d'avrigl 2011

Schletas notas per la regenza giapunaisa. Passa dus terzs dals Giapunais n'èn betg cuntents cun l'agir da la regenza en la crisa suenter il terratrembel ed il Tsunami.

Dumengia, ils 17 d'avrigl 2011

En 6 fin 9 mais duai l' ovra atomara a Fukushima esser stabilisada. La gestiunaria Tepco ha preschentà in urari per dumagnar la crisa. Tenor quel dovri anc 3 mais per retegnair la radioactivitad che sorta da l' ovra donnegia.

Sonda, ils 16 d'avrigl 2011

Ils lavurers en l'ovra atomara donnegiada da Fukushima emprovan dad absorbar il material radioactiv en la mar cun il mineral Zeolith. Quai rapporta l'agentura da novitads Jiji Press.

Venderdi, ils 15 d'avrigl 2011

Il mainagestiun da l'ovra atomara a Fukushima, Tepco, è pront da pajar emprimas indemnisaziuns. L'interpresa paja radund 11'000 francs a mintga chasada pertutgada da la catastrofa atomara.

Gievgia, ils 14 d'avrigl 2011

En il Giapun enturn l'ovra atomara da Fukushima, han equipas da salvament cumenzà a tschertgar persunas sparidas suenter il terratrembel ed il tsunami

Mesemna, ils 13 d'avrigl 2011

En il Giapun hai danovamain dà in terratrembel cun ina fermezza da 5,8 sin la scala da Richter. Quai tenor indicaziuns d'in emettur da televisiun.

Mardi, ils 12 d'avrigl 2011

En il Giapun hai danovamain dà in ferm terratrembel en il Nordost dal pajais. Quel ha gì ina fermezza da 6,3 sin la scala da Richter. Quai tenor las autoritads.

Glindesdi, ils 11 d'avrigl 2011

Exact in mais suenter la catastrofa en il Giapun hai dà oz in ulteriur terratrembel da la fermezza 6,6. Perditgas rapportan ch'era las chasas a Tokio han balluccà.

Dumengia, ils 10 d'avrigl 2011

Schuldads giapunais han cumenzà cun ina nova tschertga suenter unfrendas dal terratrembel e dal tsunami. 22'000 schuldads tschertgan sin terra, sin l'aua ed ord l'aria, quai cun excepziun da la regiun serrada enturn l'ovra atomara da Fukushima.

Sonda, ils 09 d'avrigl 2011

La radioactivitad en l'aua da la mar avant l'ovra atomara Fukushima è puspè s'augmentada. Sco quai ch'il gestiunari da l'ovra atomara communitgescha, saja la concentraziun dal jod radioactiv 131, 2800 giadas pli auta che lubida. Il gestiunari da l'ovra vul perquai eriger anc oz ina barriera d'atschal per evitar uschia che anc dapli aua radioactiva cula en la mar.

Venderdi, ils 08 d'avrigl 2011

Il construider dad autos giapunais Toyota vul cumenzar anc quest mais da puspè producir en il Giapun. Quai tenor infurmaziuns dal concern. Er il scumond da vender products agriculs ord la regiun da Fukushima duai vegnir abolida.

Gievgia, ils 07 d'avrigl 2011

Ils lavurers en l'ovra atomara da Fukushima han emplenì il reactur donnegià cun nitrogen. Uschia vul ins impedir ch'i vegnia danovamain ad in'explosiun sco curt suenter l'accident.

Mesemna, ils 06 d'avrigl 2011

La gestiunaria da l'ovra atomara Tepco ha danovamain stuì conceder, ch'ins haja chattà fastizs da plutonium, ch'è fermamain radioactiv. Persuenter èsi grategià, da serrar ina fora or da quella che culava ora aua contaminada.

Mardi, ils 05 d'avrigl 2011

La glieud en la vischinanza da l'ovra atomara da Fukushima duai survegnir emprimas indemnisaziuns. Ils daners pudessan vegnir la fin dal mais. Quant n'è anc betg cler.

Glindesdi, ils 04 d'avrigl 2011

Tepco, il possessur da l'ovra atomara donnegiada Fukushima en il Giapun, vul manar passa 11'000 tonnas aua ch'è contaminada cun radioactivitad en la mar. La regenza dal Giapun tema dentant las consequenzas.

Dumengia, ils 03 d'avrigl 2011

Dus lavurants da l'ovra atomara destruida Fukushima 1 en il Giapun èn vegnids chattads morts. Tenor la polizia èn els unfrendas dal tsunami.

Sonda, ils 02 d'avrigl 2011

Il primminister dal Giapun Naoto Kan ha visità la regiun da crisa en ses pajais. Quai è stà si'emprima visita suenter la catastrofa da terratrembel ed il Tsunami, rapporta l'agentura da novitads Kyodo. Sco emprim è el stà en la citad da 20'000 abitants Rikuzentakata, ch'è vegnida tutgada ferm da l'unda dal tsunami.

Venderdi, ils 01 d'avrigl 2011

Il concern d'energia giapunais Tepco ha concedì sbagls tar la mesiraziun da la radioactivitad en l'ovra atomara Fukushima. Plinavant è la Tepco vegnida admonida da l'autoritad da segirtad atomara, ella n'haja betg mess a disposiziun a ses lavurants avunda apparats da mesirar la radiaziun.

Gievgia, ils 31 da mars 2011

En la vischinanza da l'ovra atomara Fukushima han ins chattà aua sutterrana fitg irradiada. Malgrà recumandaziuns da la surveglianza nucleara giapunaisa, ha la regenza giapunaisa refusà d'extender la zona d'evacuaziun enturn l'ovra atomara Fukushima. Entant è Nicolas Sarkozy viagià en il Giapun. El è l'emprim schef da stadi da l'exteriur che ha visità il Giapun dapi il terratrembel.

Mesemna, ils 30 da mars 2011

La situaziun en l'ovra atomara Fukushima è vinavant or da controlla. En l'aua da mar avant l'ovra è vegnida mesirada ina radioactivitad che surpassa las valurs da cunfin per 3355 giadas, quai tenor indicaziuns uffizialas. L'autoritad internaziunala d'energia atomara IAEA cusseglia al Giapun dad evacuar supplementarmain il lieu Iitate. Er Greenpeace approvescha in'evacuaziun da gronda surfatscha. La regenza vul entant serrar per adina tuts reacturs a Fukushima.

Mardi, ils 29 da mars 2011

Il concern d'energia Tepco communitgescha ch'ins haja chattà en plirs lieus ordaifer l'ovra atomara Fukushima plutonium. In metal grev, fitg toxic, ch'ha ina perioda radioactiva da bun 24'000 onns. Il material radioactiv sfundria il mument en il terren.

Glindesdi, ils 28 da mars 2011

En il terren enturn l'ovra atomara Fukushima en il Giapun han ins chattà fastizs da plutonium, in metal fermamain tissientà. Tenor la regenza èn ils bastuns nuclears dal reactur 2 per part luads. Plinavant ha il ministeri da sanadad communitgà ch'ins na dastga betg duvrar l'aua da plievgia.

Dumengia, ils 27 da mars 2011

La radioactivitad da l'aua en il local da turbinas dal reactur 2 da l'ovra atomara Fukushima na saja betg uschè auta sco pretendì. Il gestiunari da l'ovra atomara, la Tepco, ha ditg ch'ins haja infurmà fallì oz l'avantmezdi. L'aua saja bain radioactiva, dentant na saja quella betg 10 milliuns giadas pli auta che normal. Con auta che la concentraziun è, n'ha Tepco dentant betg ditg.

Sonda, ils 26 da mars 2011

En l'ovra atomara a Fukushima han ins mesirà fitg autas concentraziuns da cäsium 137. Ina substanza ch'è fitg privlusa per il carstgaun e che resta ditg en l'ambient e l'aua da la mar cuntegn immens grondas dosas da jod 131.

Venderdi, ils 25 da mars 2011

09.44 Il gestiunari da l'ovra atomara da Fukushima, Tepco, di ch'i saja grev da constatar, danunder che la radioactivitad en l'aua dal reactur 3 vegnia. Pussaivel saja ch'ella derivia dal batschigl, nua che l'aua tschessia. 11.06 La surveglianza d'atom dal Giapun declera ch'i na saja betg fitg probabel ch'i dettia sfessas en ils containers dal reactur 3 ed en il tanc da pressiun. 11.17 La medema instanza manegia che la radioactivitad en l'aua dal bloc 3 pudessi esser d'attribuir a las emprovas da sfradentar il reactur. 11.38 Il primminister dal Giapun, Naoto Kan, empermetta indemnisaziuns a firmas ch'han patì donns pervi da la catastrofa atomara.

Gievgia, ils 24 da mars 2011

Novs terratrembels posteriurs 01.10 In terratrembel da la fermezza 4,9 ha stremblì l'ost dal Giapun. I na dat nagins donns da num ed er nagin tsunami. En quella regiun èn terratrembels posteriurs usitads. 01.38 Suenter ina pausa da prest in di vegn puspè cumenzà a lavurar en il reactur 3 da l'ovra atomara da Fukushima. 07.11 En l'ovra atomara da Fukushima èn trais lavurers vegnids vulnerads d'irradiaziuns radioactivas. 09.26 En il nord dal Giapun hai dà in terratrembel posteriur da la fermezza 6,1. 15.54. La Frantscha annunzia ch'ella veglia publitgar ils resultats dals tests d'in studi da segirtad per ovras atomaras enfin la fin dal 2011. En il decurs dal di han l'Australia, il Singapur, ils Stadis Unids e la Russia proclamà in stop d'import da mangiativas ord la regiun enturn Fukushima.

Mesemna, ils 23 da mars 2011

06.20 En l'aua da baiver a Tokio vegn mesirà memia blera radioactivitad. Ins na dastga betg dar l'aua a pops pitschens.

Mardi, ils 22 da mars 2011

La situaziun en il Giapun resta vinavant precara. Gronds quitads als experts fa il reactur 1. Là sajan las temperaturas s'auzadas fermamain. Ord il reactur 2 vegn vinavant vapur. La mesemna savess in nivel radioactiv cuntanscher la Svizra. Experts dian dentant che quella na saja betg malsegira.

Glindesdi, ils 21 da mars 2011

La polizia en il Giapun quinta suenter il terratrembel ed il tsunami cun pli che 18'000 morts. 8'800 baras han ins gia chattà ed identifitgà. Passa 12'000 persunas valan anc sco sparidas. Ils reacturs en l'ovra atomara da Fukushima han puspè electricitad. Sch'il sistem da sfradentar funcziunescha n'è anc betg cler.

Dumengia, ils 20 da mars 2011

Il reactur 2 da l'ovra atomara Fukushima ha puspè current electric. Uss emprova ils tecnichers da puspè metter en funcziun ils sistems da sfradentar. Entant sto il reactur 3 puspè vegnir sfradentà cun aua. Avant era la pressiun là s'augmentada fitg. Ins n'haja dentant betg stuì laschar sortir vapur radioactiva. Nov dis suenter il terratrembel ed il tsunami en il nordost dal Giapun han ins chattà dus survivents da la catastrofa.

Sonda, ils 19 da mars 2011

Ins ha chattà jod radioactiv en l'aua da spina da Tokio. Plinavant han ins constatà radioactivitad en las mangiativas da la regiun da Fukushima. Il Giapun ponderescha in scumond da vendita da quellas mangiativas. Ils reacturs 1 e dus èn vegnids colliads cun ina lingia d'electricitad, la lingia na saja dentant anc betg colliada cun la rait. La regenza giapunaisa discurra d'ina stabilisaziun da la situaziun enturn il reactur 3. Da sfradentar il reactur dad ordaifer haja fatg effect.

Venderdi, ils 18 da mars 2011

Tenor l'autoritad internaziunala d'engia atomara IAEA è la situaziun en l'ovra atomara Fukushima sa stabilisada. Tuttina han las autoritads giapunaisas augmentà il grad da grevezza sin stgalim 5. Fin uss han il terratrembel ed il tsunami en il Giapun custà la vita a passà 6900 umans.

Gievgia, ils 17 da mars 2011

Igl è grategià da metter in cabel d'electricitad vi dal reactur 2. Da proveder il reactur cun electricitad cumenza pir cura che las mesiras da sfradentar il reactur 3 èn terminadas, han communitgà las autoritads giapunaisas da l'IAEA, la surveglianza internaziunala da l'energia atomara. Cun l'electricitad emprov'ins da puspè metter en funcziun il sistem da sfradentar dal reactur.

Mesemna, ils 16 da mars 2011

En il Giapun è la situaziun enturn l'ovra atomara da Fukushima betg pli sut controlla. Suenter ulteriurs incendis en dus reacturs e suenter che la radioactivitad è s'augmentada temporarmain fitg ferm, han ins stuì evacuar per in'ura ils lavurers da l'ovra atomara.

Mardi, ils 15 da mars 2011

Ils collavuraturs da Fukushima I e II vegnan evacuads. En las ovras atomaras restan mo quels che ston exnum. Adina puspè vegn mesirà grondas valurs da radioactivitad ed en il reactur IV brischi duas giadas.

Glindesdi, ils 14 da mars 2011

Dapi il grond terratrembel datti adina puspè terratrembels posteriurs. Il glindesdi scurlatta in terratrembel puspè fitg ferm il pajais. Las autoritads curregian ensi il dumber d'unfrendas.

Dumengia, ils 13 da mars 2011

In ulteriur sistem da sfradentar in reactur atomar na funcziuna betg pli ed anc dapli glieud sto vegnir evacuada.

Sonda, ils 12 da mars 2011

Suenter il terratrembel ed il tsunami fan las ovras atomaras donnegiadas quitads. Il sistem da sfradentar na funcziunan betg. En il reactur I da l'ovra atomara Fukuschima datti ina explosiun. La zona d'evacuaziun sto vegnir extendida sin 20 kilometers enturn l'ovra atomara Fukushima.

Venderdi, ils 11 da mars 2011

Cun in terratrembel da la fermezza 9 sin la stgala da Richter ha la catastrofa en il Giapun cumenzà. Il terratrembel ha numnadamain devastà blers bajetgs e stuschà l'insla principala dal Giapun per 2,4 meters. Entras il terratrembel hai era dà in tsunami cun undas immensas che han devastà tut quai ch'era a la riva.