Martin Derungs

Premi grischun da cultura 2009 Il purtader dal premi grischun da cultura 2009 ha num Martin Derungs. La regenza undrescha sias prestaziuns sco cumponist innovativ da musica instrumentala e d'ovras teatralas cun in'attracziun internaziunala, sco er sia activitad sco cembalist e sco organist. Il premi è dotà cun 30'000 francs.

Martin Derungs Bild in Lightbox öffnen.

Legenda da maletgs: Martin Derungs RTR, G. Hosang

Biografia

Il pianist, cembalist e cumponist Martin Derungs è naschì l'onn 1943 a Cuira. El ha fatg il studi da musica a Turitg, Basilea e Minca. En sia carriera è el tranter auter stà docent a differentas scolas autas da musica ed el ha era lavurà per meds da massa. Ils ultims onns ha Martin Derungs vivì sco musicist e cumponist liber a Turitg. Martin Derungs ha survegnì l'onn 1992 in premi da reconuschientscha dal chantun Grischun e l'onn 2003 il premi da cultura da la citad da Cuira. L'ovra cumpositorica dal victur dal premi da cultura dal Grischun 2009 è vasta. Intgins exempels: L'opera "Bündner Wirren" dal 1988, l'opera "Anna Göldi" al Teater da la citad da Cuira (1993).

Nus essan s'inscuntrads cun Martin Derungs a Turitg sin il Helvetiaplatz

Il mund musical da Martin Derungs

Il musicist Martin Derungs survegn quest onn il premi da cultura dal chantun Grischun. Dapi bunamain 25 onns viva Martin Derungs, ch'è creschì si a Cuira, da sia musica. En quest temp ha el cumponì diversas ovras e concertà sco pianist e cembalist en blers lieus sin tut il mund. Nus avain visità Martin Derungs a Turitg ed el ha dà invista en ses mund musical.