555 onns Val Schons – ed ussa?

Vistas, invistas ed intervistas da Casper Nicca Avant 555 onns è capità in veritabel scandal en Val Schons, in mazzament politic. Ma tge è propi vair da quell'istorgia? Pertge è insumma vegnì fatg festa quest onn en Val Schons, inclusiv inscenaziun dad in gieu festiv? Il redactur Casper Nicca è stà questa stad en tschertga da respostas sin quellas ed autras dumondas che han fatschentà "ils da Schons". Ed el ha a la fin dals quints era filmà il gieu festiv "rAmurs" da Silvio Huonder. Ma dasper mussar teater e tribuna en plaina pumpa, è anc vegnì raquintà bler auter or da la Val Schons.

555 onns èsi nà ch'ils da Schons èn sa cumprads libers da l'uvestgieu da Cuira. La legenda vesa quest pass pli eroic: Gion Caldar, l'onn 1458 in pur da Farden ed oz in pau il noss Wilhelm Tell haja smatgà il chastellan impertinent en la broda e mazzà el. El haja sin quai clamà ensemen ils purs libers e loschs da la Val Schons ed els hajan chatschà tut ils chastellans ord la val e demolì las turs. Ed ussa? 555 onns pli tard fissi puspè ina giada temp da far festa. Ma datti era motivs da far festa? Co vai a quels da Schons? Quai hai jau vulì savair ed hai perquai pachetà la camera e sun ì a la tschertga da respostas.

Jau cun camera. Bild in Lightbox öffnen.

Legenda da maletgs: Jau cun camera.

Entschet mes viadi hai jau ad Andeer cur che la reschissura Menga Huonder-Jenny ha clamà ensemen ils var 40 amaturs a l'emprima prova pal gieu festiv:

Provas dals amaturs ...

Nicca Casper - prova dals amaturs toptoptop_RTR000000225948- MP4_q20.mp4

Qua datti anc lavur ... Ed jau sun ì dals amaturs tar ils professiunals. Era dus acturs professiunals numnadamain, cun ragischs en u almain lioms tar la Val Schons èn sin tribuna: Anita Iselin ch'è creschida si ad Andeer, e René Schnoz ch'enconuscha Maton da las vacanzas.

Provas dals professiunals ...

Nicca Casper - prova dals professiunals toptoptop_RTR000000225947- MP4_q20.mp4

Cun lavurar cun ils acturs amaturs da teater da la Val Schons ha René Schnoz per propi emprendì d'enconuscher ils da Schons. E lura? Co èn els pia? Cun in surrir ha el tradì a mai co el vesa quels da Schons ...

Co èn ils da Schons?

Nicca Casper-co en ils da Schons toptoptop_RTR000000225945- MP4_q20.mp4

"Purs e chaus dirs", uschia sajan quels da Schons ... Quai pudess era il chastellan avant 555 onns avair ditg, hai jau pensà per mai... E cun patratgar enavos è a mai era vegnì endament il gieu festiv dal 1958. Gea alura avevan ils purs e chaus dirs festivà la libertad cun in gieu festiv ch'è restà en memoria fin oz tar quels da Schons ...

Propi tar mintgin e mintgina cun chavels grischs ch'jau hai entupà sin mes viadi è il gieu dal 1958 anc preschent. Sch'ella n'haja nagina tema da la latta dal gieu dal 1958, hai jau perquai dumandà la reschissura:

Nagina tema ...

Nicca Casper-nagina tema toptoptop_RTR000000225946- MP4_q20.mp4

Ussa hai jau mez survegnì mirveglias e sun ì en l'archiv da la Televisiun Svizra per guardar sch'i na dettia betg in film da questa festa. E vairamain. jau hai chattà ina contribuziun da la "Wochenschau" dal 1958. Gea, la televisiun naziunala, alura anc nair ed alva, aveva schizunt rapportà da la festa da Schons.

Anno 1958 ...

Nicca Casper-anno 1958 toptoptop_RTR000000225954- MP4_q40.mp4

... ed anc ina ivetta hai jau chattà en l'archiv. Numnadamain co ch'il Gion Caldar ha propi mazzà il chastellan. Quella giada en in'emissiun da la Televisiun Rumantscha dal 1990 moderada da Mariano Tschuor, oz noss directur. E nus vegnin ad entupar Christian Hassler en la rolla principala, il medem Christian Hassler, che nus avain gia emprendì d'enconuscher tar las provas dals amaturs.

Gion Caldar mazza il chastellan ...

Nicca Casper - Gion Caldar mazza toptoptop_RTR000000225955- MP4_q20.mp4

Mo ussa avunda istorgia. Quai ch'interessescha gea mai per propi è sche quels da Schons han oz, il 2013 era anc motivs da far festa. Co vai ad els e nua èn els sin via? Il 1958 era la gronda speranza la forza d'aua cun l'empermischun dals tschains d'aua. Las grondas ovras idraulicas da la KHR (Kraftwerke Hinterrhein) era amez la construcziun. Il 1963 èn ils emprims tschains d'aua rivads en Val Schons. Enfin oz en tut passa 200 milliuns francs. Mo han quels daners purtà il svilup spetgà? Per ir a funs a questa dumonda sun era jau ì a funs. Jau sun stà giudim il mir da fermada da Balamburtg ed era en curtin tar il president da la corporaziun ch'administrescha ils daners dals tschains d'aua: ina "emprima carta postala" per la forza idraulica ...

Tschains d'aua: ier purtà ritgezza, oz in frain? ...

Nicca Casper - tschains daua toptotpop_RTR000000225953- MP4_q20.mp4

Po pia esser ch'els n'èn betg gist vegnids investids spectacularmain original, mo els han tuttina purtà in tschert bainstar a las vischnancas. Ed uschia era procurà ch'i dat anc glieud che stat qua e che l'economia flurescha. Flurescha? Gliez hai jau lura tuttina vulì savair pli precis. Perquai hai jau prendì la camera a sun ì tar il Hermann. Mintgin da Schons sa tgi ch'jau manegel, sche jau ditg "ir tar il Hermann", Quai è in dals dus garaschists da la muntogna da Schons e l'interpresa la pli gronda sin la muntogna ...

Il Hermann ...

Nicca Casper - il Hermann toptoptop_RTR000000225943- MP4_q20.mp4

Il Hermann di, ch'i dettia lavur avunda. I para dad ir bain als manaschis. Els pudessan sa pusar enavos e laschar dar il sulegl. Be quai na fan els lura tuttina betg. En mintga cas betg tuts. Il pled innovaziun è ils davos onns era rivà en Val Schons. Oz datti schizunt insatgi che porta il pled innovaziun sin la bandiera: Carmelia Maissen, la sviluppadra regiunala da la regioViamala. Ella sto tranter auter guardar che las interpresas sa sviluppan enavant. Cun ella ha jau discurrì sur da l'innovaziun en la "segunda carta postala" cun l'exempel innovativ, la "Via Spluga".

Quant innovativs èn quels da Schons? ...

Nicca Casper - quant innovativs en... toptoptop_RTR000000225950- MP4_q20.mp4

Restain anc in zichel tar la Via Spluga. Sch'ina innovaziun funcziuna propi ves'ins la fin vid la svieuta. Noss exempel, la Via Spluga - è ina tala innovaziun cun success. Quai ves jau mintga di durant la stagiun da stad sin via. Entiras caravanas da viandants passan tras la Val Schons. E las cifras che Denise Dillier, la directura da Viamala turissem ha dà a mai, conferman l'impressiun.

Bild in Lightbox öffnen.

Legenda da maletgs:

La Via Spluga è dentant gia passa 10 onns veglia. A la tschertga da innovaziuns ed innovaturs pli actuals hai jau telefonà al parc natiral Beverin e dumandà sch'els enconuschian forsa innovaturs. "Geabain" han els detg. Els hajan gist surdà d'inventar in nov product per il parc a duas interpresas indigenas. E sin quellas sun jau stà spanegià:

Duas persunas innovativas ...

Nicca Casper - duas persunas innovativas toptoptop_RTR000000225937- MP4_q20.mp4

Ussa gist èn ils dus innovaturs pia vid ina lavur per il parc natiral Beverin. La lezia: crear in sistem da mobiglias per plazzas da grillar. Natiralmain hai jau ussa vulì savair co els dus van vidlonder sch'els creeschan in nov product.

... lavuran vid in project innovativ

Nicca Casper - lavuran vid in project toptoptop_RTR000000225938- MP4_q20.mp4

Ed ussa datti pia nagut auter che spetgar. Jau sun spanegià co che l'innovaziun da Curdegn Bandli e Gion Michael vesa lura or... e RTR vegn franc a rapportar. Co aveva René Schnoz detg? Purs e chaus dirs... Precis purs. Purs, quai èn anc oz ils blers, u almain, sco Hermann, vivan els dals purs. Perquai maina mai il proxim viadi tar ina giuvna famiglia da purs. Si als culms da Lohn.

Far il pur tranter ier e damaun ...

Nicca Casper - far il pur toptoptop_RTR000000225939- MP4_q20.mp4

Hansjörg Hassler. Bild in Lightbox öffnen.

Legenda da maletgs: Hansjörg Hassler. mad

Dumeni Beeli di quai cleramain: l'avegnir porta era per ils purs midadas. La nova politica d'agricultura è sin via. Ils purs ston puspè ina giada guardar en tge direcziun che la via va. Dumandà vegn era qua l'innovaziun ad esser. Co i stat cun quella tar ils purs hai jau vulì savair dal pur, cusseglier naziunal, president dals purs grischuns e president dal parc natiral Beverin, Hansjörg Hassler da Donat.

In dals temas da l'avegnir pia: l'agroturissem. Rabitschar ensemen il turissem e l'agricultura. Ma savens n'è quai betg uschè simpel. Blers purs vesan il turist plitost sco in impediment. Il turist è quel, che stat amez via cura ch'ins vul passar cun il tractor. Quel che sa lamenta da prads adina pli grass cun adina pli paucas flurs. Per mai è il simbol per quest dilemma tranter turissem ed agricultura il lajet als culms da Lohn - il Libi. Quai è il lieu preferì dals turists, ma gist là duessi dar ina meglieraziun. La "terza carta postala":

Ils purs da Schons ed ils turists ...

Nicca, Casper - ils purs da Schons ed ils turists toptoptop_RTR000000225952- MP4_q20.mp4

Jau bandun il Libi. Sin il viadi engiu stoi jau puspè patratgar vid ils pleds "purs e chaus dirs" ... Ed almain per ils giuvens na valan els betg. Ils chaus da lez èn anc pli loms, ed ils blers na fan betg il pur. Ils blers van. Ma cun discurrer cun els hai jau sentì: sch'els van, sche n'èsi betg in ir. Igl è insatge tranter ir e turnar. Il simbol per els hai jau chattà en l'istorgia da la Rofla: per igl "ir ubain star" la "quarta carta postala":

Jau vuless star en la val, sch'i va ...

Nicca Casper - jau vuless star en la val... toptoptop_RTR000000225951- MP4_q20.mp4

Mes viadi tras mia val va a fin. Bleras respostas han els dà a mai, ils mes convischins da Schons... E lura? Co vai ussa pia a quels da Schons? Na! Respostas simplas na datti betg. Mo jau crai: festivar ils 555 onns dastgan els schon! Durant ch'jau hai rimnà respostas, han auters, nus sa regurdain anc, fatg provas. Eba per festivar ils 555 onns libertad. Ed els èn ussa pronts par la premiera:

Jau na sun betg gnervus ...

Nicca Casper - jau na sun betg gnervus toptoptop_RTR000000225940- MP4_q20.mp4

Ed ussa sco empermess a l'entschatta: il gieu festiv "rAmurs" scrit da Silvio Huonder cun la musica da Curò Mani sut la reschia da Menga Huonder-Jenny. In gieu festiv plain da fatgs istorics, ma cunzunt plain umor, fantasia e musica. Plain da scenas co quellas quatter qua:

rAmurs - il gieu festiv ...

Nicca Casper - ramurs il gieu festiv toptoptop_RTR000000225942- MP4_q20.mp4

E lura? Co hai plaschì? ...

Nicca Casper - alura co ai plaschi toptoptop_RTR000000225941- MP4_q20.mp4

Impressiuns da la premiera