Recepziun da radio

Survista da tut las pussaivladads per retschaiver Radio Rumantsch

In radio DAB+. Bild in Lightbox öffnen.

Legenda da maletgs: In radio DAB+. RTR

Sutvart chattais ina survista da tut las pussaivladads per retschaiver Radio Rumantsch.

Radio digital mobil (DAB+)

En il sectur dal radio digital hai dà in grond svilup tecnologic cun il standard DAB+. La finamira da questa tecnologia digitala è da porscher ina auta qualitad da tun cun ina gronda paletta da programs e da remplazzar uschia a lunga vista la recepziun d’UUC/UKW.

A partir dals 17 d’october 2012 vegn il Radio Rumantsch era emess en l’entira Svizra cun la nova tecnologia da DAB+. AuditurAs en la Bassa che han anc in apparat da DAB ston midar sin in apparat DAB+ per pudair tadlar vinavant il RR. Cun ils suandants pass pudais Vus sclerir sche Vus essas gia en possess d’in receptur cun DAB+.

Undas ultracurtas (UUC)

Tgi che taidla radio fa quai per il solit sur undas ultracurtas (UKW). Sur quellas pon ins retschaiver il program dal Radio Rumantsch en l'entir chantun Grischun ed en la Val dal Rain.

Rait da cabel

Sin bunamain tut las raits da cabel svizras pon ins tadlar RR. Las differentas raits porschan il program da RR en qualitad usitada analoga u per part schizunt en qualitad digitala (DVB).

Na duess quai betg esser il cas, dumandai il provider da la rait da prender RR en la paletta da programs.

Sur satellit

Radio Rumantsch emetta ses program era en il standard DVB sur satellit. Per che Vus possias tadlar radio sur satellit, duvrais Vus in'antenna parabolica ed in receptur da satellit DVB-S.

Qua chattais Vus las indicaziuns necessarias per programmar Voss receptur:

  • Satellit: 13° Ost Eutelsat Hotbird
  • Frequenza: 12.399 MHz
  • Polaritad: H (orizontal)
  • Symbolrate: 27’500 / FEC ¾
  • Audio-PID: 216 (rom)
  • Format: MPEG Audio Version 1, Layer 2 / 256 Kbps

Sur internet

Sper las vias convenziunalas da broadcast porscha il Radio Rumantsch era differentas pussaivladads da recepir il program da RR sur l’internet. Oz avais Vus la pussaivladad da recepir RR a temp real (Live-Stream) u schizunt era anc da tadlar in’emissiun or da l’archiv (On Demand). Per pudair tadlar mobil tenor giavisch emissiuns passadas pon ins era chargiar las emissiuns da RR direct sco podcast u via computer sin in player local.