Siglir tar il cuntegn
Inhalt

Lexicon B Budissem

Il budissem è naschì avant 2500 onns en l’India or dal hinduissem. En l’India datti dentant ozendi paucs che crain en il budissem. Ils budists vivan oravant tut en il Tibet, en la Tailanda, Sri Lanka, Corea, China e Giapun.

Statua da Buda
Legenda: Statua da Buda Google

Derivanza
Fundà questa religiun ha il prinzi da l’India Siddharta Gautama. El ha vivì il 6avel tschientaner. El è creschì si en in palazi e n’enconuscheva betg la vita ordaifer quel. Malgrà ch’el aveva tut quai ch’el vuleva, aveva el il sentiment ch’insatge manchia en sia vita. Cun 29 onns ha el bandunà il palazi ed è ì sin viadi.

La legenda raquinta che Siddharta haja vis sin ses viadis ch’ils umans pateschan pervi da malsognas, da la vegliadetgna e da la mort. Perquai ha el decidì da chattar ora pertge che quai è uschia e tge ch’i fiss da far per evitar quai. Sinaquai è el daventà pader. Suenter ch’el ha passentà bler temp cun far gigina e cun ponderar, ha el chattà las respostas per sias dumondas: las quatter vardads noblas. El è danovamain viagià tras il pajais ed ha dà vinavant sia savida. Blers èn suandads el ed han numnà el Buddha, quai che vul dir tant sco “il sclerì”.

 

Tipitaka - las scrittiras sontgas
Legenda: Tipitaka - las scrittiras sontgas Google

Sontga scrittira
Il budissem enconuscha blers cudeschs sontgs. Il pli vegl ha num Tipitaka. El descriva la vita da Buddha e declera la ductrina e las reglas per viver en la claustra.

 

Tempel en l'India
Legenda: Tempel en l'India Google

Tempel
Per ils rituals religius han ils budists tempels. En l’India ed en la Sri Lanka èn ils tempels savens era bajegiads en la grippa. En auters lieus èn ils tempels adattads a l’architectura locala. Bleras giadas èn il tempels colliads cun claustras da paders.

 

Dharmachakra, la roda da la ductrina
Legenda: Dharmachakra, la roda da la ductrina Google

Simbol
Il Dharmachakra, la roda da la ductrina è il simbol per il budissem. Ils otg radis da la roda simboliseschan ils otg trutgs nobels. Quests otg trutgs tutgan tar la quarta vardad nobla.

 

Infurmaziuns davart las tschintg pli grondas religiuns pudais leger qua...