Siglir tar il cuntegn

Lexicon C Cristianissem

Cun 2,1 milliardas cartents è il cristianissem la pli gronda religiun dal mund. Il cristianissem datti dapi var 2000 onns.

Jesus medaghescha ils malsauns
Legenda: Jesus medaghescha ils malsauns Google

Derivanza
Jesus è naschì avant var 2000 onns en Galilea, ina part da la Palestina. Sia famiglia era giudaica. Cura che Jesus ha gì 30 onns, ha el cumenzà ad ir tras il pajais ed ha predegià. Da quest temp devi blers predicaturs che faschevan attent ils umans sin ils cumandaments da Dieu (ins pudess dir las reglas da Dieu). Jesus scheva dentant che Dieu haja gugent ils umans sco ses uffants, era sch’ils umans na sa tegnian betg adina vid ses cumandaments. Jesus sa deditgava oravant tut a persunas paupras, malsaunas e persunas che han cuntrafatg a las leschas.

 

Jesus vi da la crusch
Legenda: Jesus vi da la crusch Google

Persunas fitg cartentas n’avevan betg plaschair da quai che Jesus predegiava. Ellas manegiavan che Jesus sa dettia ora sco il Messias ch’ils profets avevan annunzià. Blers cartevan quai. Auters schevan che Jesus saja in battaglinas malsegir. Perquai è Jesus vegnì arrestà e mess vi da la crusch. Ils cristians crain che Jesus saja levà suenter trais dis da mort en vita.

 

Ina Bibla veglia
Legenda: Ina Bibla veglia Google

Sontga scrittira
Per ils cristians è il Nov Testament da la Bibla la pli impurtanta scrittira. Ella cuntegna tranter auter ils quatter evangelis che descrivan tuts la vita da Jesus. Dentant er il cudesch sontg dal giudaissem tutga tar las scrittiras dal cristianissem. En la Bibla sa numna quel Vegl Testament.

 

La Baselgia da S. Gion a Mustér
Legenda: La Baselgia da S. Gion a Mustér RTR

Las baselgias
Il lieu nua ch’ils cristians sa rimnan per far oraziun e celebrar la messa è la baselgia. Per il pli han las baselgias ina u pliras turs u clutgers cun zains. Quels duain far attent ch’igl è da far oraziun. La baselgia è averta per mintga cartent.

 

La crusch
Legenda: La crusch RTR

Simbol
La crusch è il simbol principal per il cristianissem. Ella simbolisescha d’ina vart la crucificaziun da Jesus. Da l’autra vart simbolisescha il segn era la colliaziun cun la terra ed ils conumans (l’axa orizontala) e la colliaziun cun Dieu (l’axa verticala).

 

Infurmaziuns davart las tschintg pli grondas religiuns pudais leger qua...