Siglir tar il cuntegn

Lexicon G Gieu per daners

Savair giugar per daners era online quai duai esser pussaivel cun la nova lescha da gieus per daners. Quai munta intginas midadas en la lescha. Quellas midadas plaschan dentant betg a tuts. Motiv: cun questa nova lescha èn casinos online da l'exteriur bloccads en Svizra.

Legende: Video Tge èn gieus per daners? abspielen. Laufzeit 01:47 Minuten.
Or da Minisguard dals 02.06.2018.

Il Minisguard declera tge che gieus per daners èn insumma ed ils arguments da pro e contra.

Pro:

  • La lescha rinforza la protecziun cunter la dependenza dal gieu. Betg be casinos, mabain er societads da lottarias ston excluder persunas dal manaschi da gieus, sche quellas èn dependentas dal gieu.
  • La lescha stgaffescha claras reglas per gieus per daners en l'internet. L'access a paginas cun gieus per daners illegalas en l'exteriur vegn bloccà.
  • La lescha stgaffescha la basa legala per persequitar la manipulaziun da scumessas da sport e la lavada da daners.

Contra:

  • La lescha na protegia betg avunda ils giugaders da daventar dependents dal gieu. Il parlament ed ils casinos han refusà las pretensiuns centralas dad ina taxa da prevenziun ed ina cumissiun consultativa speziala.
  • La lescha porscha la basa legala per bloccar paginas internet betg giavischadas. Talas bloccadas da l'internet èn ina greva intervenziun en la libertad economica ed en la libertad d'infurmaziun.
  • La lescha vul conceder als casinos indigens in monopol sin purschidas d'internet. La concurrenza nungiavischada duai vegnir exclusa dal martgà.