Siglir tar il cuntegn

Lexicon I Islam

La religiun da l’islam è var 1400 onns veglia. Sin l’entir mund datti var 1,3 milliardas muslimas e muslims. En Svizra vivan blers carstgauns che han la religiun islamica.

La religiun da l’islam è var 1400 onns veglia. Sin l’entir mund datti var 1,3 milliardas muslimas e muslims (quai munta quel/quella che suttametta a Dieu).

Muslim vi dal urar
Legenda: Muslim vi dal urar Reuters

Minarets, muslims, moscheas - tut pleds che vus avais forsa era gia udì. E tut quests pleds han in connex cun la religiun da l'islam. En Svizra vivan blers carstgauns che han la religiun islamica, quellas persunas numnan ins muslims. Il Minisguard mussa co ch'ils muslims vivan, numnadamain tenor las 5 pitgas da l'islam.

&ubsp;

Derivanza

Mohamed e ses aderents
Legenda: Mohamed e ses aderents Google

Mohamed, il profet da l’Islam è naschì enturn l’onn 570 a Mecca. Quai è ina citad en il vest da l’Arabia Saudita. Da quest temp carteva la glieud ch'abitava là en differents dieus. Els enconuschevan dentant il giudaissem ed il cristianissem.
Mohamed aveva circa 40 onns, cura che l’anghel Gabriel è cumparì ad el ed ha ditg ad el ch’el duai dar vinavant als umans il messadi da Dieu.

Allah, uschia numnan ils muslims lur dieu è il medem Dieu sco quai ch’il giudaissem ed il cristianissem enconuschan. L’islam renconuscha tant Adam ed Eva, Abraham e Moses sco lur perdavants e sco persunas che han dà vinavant il messadi da Dieu. Ils muslims enconuschan era Jesus. Tar els è el dentant in profet e betg il figl da Dieu sco tar il cristianissem.

 

Sontga scrittira

Coran
Legenda: Coran Google

Ils aderents da Mohamed han scrit quai che Mohamed raquintava. Or da quests texts hai dà il Coran, la pli impurtanta scrittira da l’islam. Il coran è per ils muslims in cudesch da leschas per la vita dal mintgadi ed era per la societad. En quel datti perscripziuns davart il nutriment, co ch’igl è da sa lavar, co ch’ils umans han da viver in cun l’auter ed era tge ch’è endretg e tge ch’è fallà. Igl è grev da chapir tge ch’il text en il Coran manegia propi, perquai datti differentas interpretaziuns.

 

Las moscheas

Moschea da Mohamed a Medina en l'Arabia Saudita
Legenda: Moschea da Mohamed a Medina en l'Arabia Saudita Google

Ils muslims sa radunan en las moscheas per far oraziun. Quai po era esser ina simpla halla. Las moscheas èn dentant era lieu d’inscunter e lieu per far festas. Las moscheas pon era avair in u plirs minarets. Quai è ina sort tur - sumegliant ad in clutger-baselgia. Sin questa tur na datti dentant nagins zains. Qua cloma il muezin ensemen (uschia vegn l’um che va sin la tur numnà) tschintg giadas per di ils muslims per far oraziun.

 

Simbol

Muezin sin in minaret. Sin il spitg ves'ins ina mesaglina.
Legenda: Muezin sin in minaret. Sin il spitg ves'ins ina mesaglina. Google

Davent dal 13avel tschientaner è la mesaglina il simbol per lur religiun. Il simbol chatt’ins savens sin cuplas u tetgs da las moscheas e da minarets.

 

Pertge cumbattan ils schiits e ils sunnits?

«En il num d’Allah e ses profet Mohamed» – quai vala quasi per l’entira populaziun da l’Irac. La gronda part crai en la religiun da l’islam. Ma i dat duas confessiuns principalas islamas – ils schiits e ils sunnits – e quellas fan en l’Irac guerra in cunter l’auter.

Infurmaziuns davart las tschintg pli grondas religiuns pudais leger qua...