Matriarcat

En culturas matriarcalas na ston las dunnas betg cumbatter per lur dretgs. Ellas giaudan grond respect en la societad.

Pir l'onn 1990 ha l'ultim chantun svizzer dà a las dunnas svizras il dretg da vuschar. En culturas matriarcalas na ston las dunnas betg cumbatter per lur dretgs – ellas giaudan grond respect en la societad. Ina cultura matriarcala è quella dals Minangkabau en il vest da l’insla Sumatra. Quai è tut in auter viver ch’en Svizra.

Cun agid da la buoba imaginada Dewi mirain nus, co sia societad sa differenziescha da la nossa.

Dewi ord il Sumatra Avrir maletg en lightbox.

Legenda da maletgs: Dewi ord il Sumatra Google

La buoba Dewi ha 10 onns ed è ina Minangkabau. Quai è in pievel che viva en il vest da l’insla Sumatra, en l’Indonesia, en vischinanza dal guaud tropic ed entamez da vulcans.
La cultura dals Minangkabau è ozendi ina da las sulettas culturas matriarcalas. Passa 3 milliuns Minangkabau datti anc, quai è bunamain la mesadad da la populaziun svizra.

Ils Minangkabau vivan da la pestga, els produceschan legums, tubac, chanella, neghels e zutger. Quels products s’audan da l’entira parentella. Sche insatgi ha per exempel dapli zutger, che quai ch’el dovra, lura vegn organisà ina festa per l’entira cuminanza. Tar quella festa datti lura gieus da fortuna. Ils premis èn ils products ch’èn danvanz. Uschia han tuts avunda per viver bain.

 

Palaz da Pagaruvung en Indonesia Avrir maletg en lightbox.

Legenda da maletgs: Palaz da Pagaruvung en Indonesia Google

Las dunnas cumondan
Dewi viva tar sia mamma, ensemen cun ses 2 frars, sia tatta, ed ils augs. Il bab da Dewi viva tar sia atgna mamma, pia la tatta da Dewi. El visita dentant savens Dewi e sia dunna. Quai è tradiziun tar ils Minangkabau. En famiglia è la tatta la scheffa.

 

Prozessiun Avrir maletg en lightbox.

Legenda da maletgs: Prozessiun Google

Il di che la tatta da Dewi mora, erta la mamma da Dewi la chasa ed il terren – e pli tard erta Dewi ils bains da sia mamma. Sche Dewi vivess en Svizra, avess ella da parter la chasa ed il terren cun ses frars e sieu bab.

 

Scola en Indonesia Avrir maletg en lightbox.

Legenda da maletgs: Scola en Indonesia Google

Tar ils Minangkabau na datti betg in sistem da votar. Sche la cuminanza ha in problem, lura sa raduna ella en in lieu ed il problem vegn discutà. En il vitg da Dewi vegn studegià, sch’ins duess bajegiar ina scola nova. En Svizra decidess uss la maioritad, gie ni na, uschia che la part pitschna perdess. Auter en il vitg da Dewi. Umens e dunnas, giuven e vegl sa participeschan a la discussiun davart la scola, enfin ch’els chattan ina soluziun che cuntenta tuts. Nagin sperda!