Radar

Radar è ina abreviaziun che munta tant sco chattar lieus cun undas radioelectricas. In radar consista ord trais apparaturas principalas.

Radar è ina abreviaziun che munta tant sco chattar lieus cun undas radioelectricas. Quai èn sumegliantas undas sco quellas ch’ils radios retschaivan per pudair tadlar in program da radio.

radar Avrir maletg en lightbox.

Legenda da maletgs: radar Google

In radar consista ord trais apparaturas principalas: in’apparatura per trametter undas radioelectricas, in’apparatura per retschaiver quellas undas ed in’apparatura per visualisar il signal.

L’apparatura per trametter e retschaiver ils signals vesa magari ora sco ina cuppa da satellit. Quella po avair la medema grondezza u lura dentant era esser bler pli gronda che quellas ch’ins vesa vid las paraids da las chasas. Auter che tar ina cuppa da satellit è era che quella sa volva enturn sasezza. Uschia pon tschiffar il territori en tut las direcziuns.

Il radar trametta undas radioelectricas che tanschan fin 500 kilometers, quai è pli u main duas giadas dal punct il pli sisum la Svizra fin il pli giudim la Svizra. Tutgan quellas undas sin in aviun, lura rebattan quellas e turnan enavos. Il radar retschaiva lura puspè il signal e po quintar ora quant lunsch davent che l’aviun è.

clamar Avrir maletg en lightbox.

Legenda da maletgs: clamar RTR

Ins po cumparegliar quai sco cun l’eco. Sche vus essas or en il liber insanua sper grippa u paraids da crap e dais in clom sche udis vus anc ina giada quai clom. Pli lunsch davent che la grippa u la paraid è e pli ditg ch’i va enfin che vus udis l’eco.

 

Il radar tira a niz quai. Pli ditg che las undas han da turnar enavos e pli lunsch davent che l’aviun è. Sche naginas undas radioelectricas turnan, lura è nagut en il territori ch’il radar cuntanscha.

Um davant radar Avrir maletg en lightbox.

Legenda da maletgs: Um davant radar Google

Sin il monitur ves’ins mintgamai in stritg che sa mova da radund sco quai che la cuppa da satellit sa mova. Là nua ch’il radar chatta insatge, vegn quai nudà sin il monitur enfin ch’il stritg vegn danovamain ed actualisescha il maletg.

 

utschè-mezmieur Avrir maletg en lightbox.

Legenda da maletgs: utschè-mezmieur RTR

Il radar han ins copià dals animals. Tuttina sco il radar funcziuna era l’orientaziun dad in utschè-mezmieur. Quels fan quai cun tuns che nus n’udin betg. Tut tenor quant ditg che l’eco ha da turnar enavos tar l’utschè sa l’utschè-mezmieur quant lunsch davent che in object è. L’utschè sa lura era sch’i sa tracta d’ina insect ch’el vul pigliar per mangiar u uschiglio insatge.

Cun il radar, ha l’uman empruvà da copiar la tecnica che l’utschè-mezmieur dovra per pudair s’orientar. In sumegliant sistem per s’orientar han era ils delfins ed auters animals.