Tgirallas

Tgi n’enconuscha betg ellas, las tgirallas, tschittas u splers sco quai ch’ellas vegnan era numnadas. Enfin che las tgirallas sgulatschan, capita dentant fitg bler.

Tgi n’enconuscha betg ellas. Quellas bellas creatiras che sgulatschan davent da la primavaira enfin l’atun da flur tar flur. Las tgirallas, tschittas u splers sco quai ch’ellas vegnan era numnadas. Uffants da Rona èn s’occupads cun las tgirallas ed han pudì emprender d'enconuscher quests insects in pau meglier.

Tgirallas - da l’ov a la tgiralla

Enfin che las tgirallas sgulatschan dentant capita bler. Jürg Schmid è fascinà gia da pitschen ensi da las tgirallas. El ha tradì intginas chaussas ch’èn main enconuschentas.

 

Tgirallas e records

Tgiralla Avrir maletg en lightbox.

Legenda da maletgs: Tgiralla RTR

I dat bleras chaussas che fan surstar. Quai n’è betg auter tar las tgirallas. Nus giain in zichel a la tschertga d’extrems e quai en il mund da tgirallas nua ch’ins na spetga gnanc da chattar records.

 

Tgiralla atlas Avrir maletg en lightbox.

Legenda da maletgs: Tgiralla atlas RTR

Probabel avais vus en il turnister ina lingera da 30 centimeters. Uss fissi temp da prender quella enta maun. Guardar sin quella e da patratgar ina tgiralla che mesira da l'ur d’ina ala fin a l’ur da l’autra ala 30 centimeters. Na cartais betg ch’i dat uschè grondas? Lura stoss jau curreger. La tgiralla atlas po vegnir precis uschè gronda.

 

Zwergminiermotte Avrir maletg en lightbox.

Legenda da maletgs: Zwergminiermotte RTR

E sche nus essan gist tar mesiras. Guarda sin la lingera quant che 3 millimeters èn. Uschè pitschna è la pli pitschna tgiralla ch’i dat. Ella sa numna Zwergminiermotte.

 

Tgiralla monarchia Avrir maletg en lightbox.

Legenda da maletgs: Tgiralla monarchia RTR

Ina tgiralla che fa surstar è la monarchina. Ella sgola gugent lunsch. Per di po ella sgular fin 50 kilometers. Durant l’enviern va ella vers sid, e per arrivar là ston las monarchinas sgular passa 3000 kilometers.

 

Tgiralla euschemon rafflesia Avrir maletg en lightbox.

Legenda da maletgs: Tgiralla euschemon rafflesia RTR

Cura ch’ins va a pe, fan ins circa 4 kilometers ad ura. La pli svelta tgiralla è la euschemon rafflesia. Ella sgola cun ina sveltezza da var 59 kilometers ad ura. Uschè svelt na dastgan gnanc ils autos charrar en in vitg.

 

Tgiralla nobelet da malencurada Avrir maletg en lightbox.

Legenda da maletgs: Tgiralla nobelet da malencurada RTR

Ina lunga vita n’han las tgirallas betg. Il nobelet da malencurada è la tgiralla che po daventar la pli veglia. Ella po vegnir 6 enfin 12 mais veglia. Autras tgirallas vivan mo intgins dis avant ch’ellas moran.

 

 tgiralla bella Avrir maletg en lightbox.

Legenda da maletgs: tgiralla bella RTR

Sch’ins contempla las tgirallas, lura schess ins che quellas sgolian in pau hectic. Ma i dat era da quellas ch’èn tut auter che hecticas. La tgiralla bella lezza batta mo 5 giadas per minuta cun las alas - quai è mintga dudesch secundas ina battida.