Dals emprims quatter svizzers ha sulet Mario Gavranovic tuc il gol. Da la vart dals Spagnols han gist trais giugaders tutgà. Uschia è il siemi a fin.
La naziunala svizra sto turnar a chasa. Quai dastga ella dentant far cun il chau ad aut.
Il gieu da quartfinal ha danovamain duvra blera gnerva. Gia en l'otgavla minuta èn ils Spagnols ids en avantatg entras in gol da Jordi Alba. Il giugader dal FC Barcelona ha sajettà ord ina distanza da bun 20 meters, in bal ch'è anc vegnì svià en gol da Zakaria. Suenter pausa han ils Svizzers reagì ed egualisà il gieu en la 68avla minuta entras Xherdan Shaqiri.
Suenter ina carta cotschna encunter Remo Freuler en la 77avla minuta han ils Svizzers stuì giugar be en 10. A partir da quest mument han ils Spagnols dà en il tact e principal durant la prolungaziun gì schanzas da gol en il tact da minutas.
Adina puspè ha il goli Yann Sommer tegnì la Svizra en il gieu. En la lutga da penaltis n'è dentant er Sommer betg vegnì da procurar ch'il siemi svizzer cuntinueschi a quest campiunadi d'Europa.
Mezfinal Spagna cunter Italia
Durant che la naziunala svizra sto turnar a chasa cuntinuescha il turnier per la Spagna che frunta en il mezfinal sin l'Italia. Ils Talians han gudagnà lur partida da quartfinal a Minca cunter la Belgia cun 2:1. Nicolo Barella e Lorenzo Insigne avevan sajettà l'Italia cun 2:0 en avantatg - avant che Romelu Lukaku ha tutgà anc avant pausa davent dal punct da penalti al 2:1. Il topscorer da la Belgia avess suenter pausa anc giu in qual schanza per sajettar il 2:2. A la fin n'hai dentant betg tanschì d'egualisar la partida.
En il mezfinal vegni uschia tar la reediziun dal final dal 2012, cura che la Spagna ha battì l'Italia gist cun 4:0. En l'otgavelfinal il 2016 era percunter l'Italia sa messa atras. La partida ha lieu quest mardi, ils 6 da fanadur a Londra.