Siglir tar il cuntegn

Header

video
Portugal – Svizra: ils puncts culminants
Or da FIFA WM 2022 dals 06.12.2022.
laschar ir. Durada: 4 minutas 58 Secundas.
cuntegn

1/8-final POR – SUI 6:1 Svizzers vegnan tramess a chasa cun in lavachau

audio
Analisa Svizra cunter Portugal cun redactur Andreas Wieland
ord Actualitad dals 07.12.2022. Maletg: Keystone
laschar ir. Durada: 3 minutas 19 Secundas.

Quai avevan ils ballapedists svizzers s'imaginà auter: En l'otgavelfinal dal campiunadi mundial va l'aventura a fin per la naziunala svizra cun lur generaziun dad aur. Cunter il Portugal n'han ils Svizzers gì nagina schanza e pers cun 1:6. Il sulet gol per la Svizra ha fatg Manuel Akanji en la 58avla minuta al 1:4, quai suenter in corner.

audio
Svizra – Portugal: vuschs dal public viewing a Scuol
ord Actualitad dals 07.12.2022. Maletg: Keystone
laschar ir. Durada: 2 minutas 51 Secundas.

L'um dal gieu è stà Gonçalo Ramos ch'ha sajettà gist trais gols ed uschia procurà per in hattrick. Il giuven giugader da Benfica Lissabon ha remplazzà en il gieu cunter ils Svizzers il superstar Cristiano Ronaldo.

En il quartfinal frunta il Portugal sin il Maroc ch'ha battì la Spagna suenter sajettar penaltis.

La prevista Portugal - Svizra

La tribuna na pudess betg esser meglra per quest duel d’otgavelfinal encunter il Portugal. L’equipa da Murat Yakin dastga dar per l’emprima giada a quest turnier en il stadion Lusail, il pli grond e spectacular stadion a quest campiunadi mundial en il Qatar. En quest stadion ch’ha plaz per bun 90’000 persunas vegn er dà ils 18 da december il final. La culissa constess pia per cuntanscher per l’emprima giada dapi il 1954 in quartfinal ad in campiunadi mundial.

video
Yakin: «I dovra in zic cletg e la dretga strategia»
Or da FIFA WM 2022 dals 05.12.2022.
laschar ir. Durada: 2 minutas 5 Secundas.

Al trenader Murat Yakin stattan a disposiziun tut ils giugaders, tut ils 26 umens èn puspè sauns e fits. E quai dovri era per pudair gudagnar encunter il Portugal che tutga tranter ils cunfavurits per il titel en il Qatar. Che la Svizra po batter il Portugal ha ella mussà questa stad en la Nations League. In’emna suenter la terrada da 0:4 a Lissabon han ils Svizzers gudagnà a Genevra il gieu da return cun 1:0 grazia ad in gol da Haris Seferovic gia en l’emprima minuta. En quel ha il Portugal però dà senza Cristiano Ronaldo. È il star sin la plazza, lura n’ha la Svizra dentant betg vesì ora bain il davos temp, er perquai che Ronaldo ha sajettà gist tschintg gols en ils davos dus gieus ch’el ha dà encunter ils Svizzers.

video
Embolo: «Jau na fatsch nagins quitads, nus essan focussads»
Or da FIFA WM 2022 dals 05.12.2022.
laschar ir. Durada: 2 minutas 40 Secundas.



Cura che dus cors battan en il pèz

La famiglia portugaisa en il Grischun e particularmain en l'Engiadina è fitg gronda. Uschè gronda ch'ils Portugais han gia dapi passa 30 onns in'atgna equipa da ballape che dat il campiunadi actualmain en 5avla liga. Ils Lusitanos de Samedan èn ina instituziun en il ballape grischun.

audio
Svizra – Portugal: il fan portugais rumantsch Fabio Martins
ord Actualitad dals 06.12.2022. Maletg: RTR
laschar ir. Durada: 3 minutas 19 Secundas.

Cler per tgi ch'il cor batta

In dals giugaders dals Lusitanos de Samedan è Fabio Martins. Il fan da ballape è sco tut ils giugaders dals Lusitanos d’origin portugais. Martins viva e lavura però gia prest 20 onns en Engiadina. Sch'ins fa ad el la dumonda per tgi ch’el tegna, per tgi che ses cor batta en l'otgavelfinal, alura na studegia el betg ina secunda. Cler: El tegna per il Portugal. Quai è sia patria, era sch'el è dachasa en l'Engiadina. Portugal per siempre – Portugal per adina.  

Cunter la Serbia hai jau tegnì cun tut mes cor cun la Svizra.
Autur: Fabio Martins abita dapi 17 onns a Zuoz

En il pèz da Fabio Martins battan dus cors. In portugais ed in svizzer. Sche la Svizra na dat betg cunter il Portugal, tegna el adina cun la Svizra. La naziunala portugaisa vegn dentant adina ad esser ses favurit. A sia squadra preferida ed al superstar Cristiano Ronaldo manca be pli il titel da campiun mundial. Uss fiss per el e per l’entira squadra il temp per scriver istorgia e per accumplir il siemi dad 11 milliuns Portugais sin tut il mund.

RTR Actualitad 12:00+

Artitgels legids il pli savens

Scrollar a sanestra Scrollar a dretga