Siglir tar il cuntegn

Header

audio
Ils puncts culminants da Tokio 2020
Or da Actualitad dals 09.08.2021.
laschar ir. Durada: 4 minutas 38 Secundas.
cuntegn

13 medaglias La Svizra ha superà sias finamiras a Tokio

Las atletas ed atlets svizzers han superà las finamiras ch’els avevan per ils gieus olimpics a Tokio. Cun 3 medaglias d’aur, 4 d’argient e 6 da bronz è la Svizra sin plazza 24 cura ch’i va per il dumber da medaglias. 13 u dapli medaglias avevan Svizras e Svizzers purtà a chasa l’ultima giada dals gieus a Helsinki l’onn 1952.

Pliras clavs per il success svizzer

Adina puspè durant ils gieus olimpics a Tokio è vegnì ludà il grondius spiert da squadra en l’equipa svizra. Il schef da missiun Ralph Stöckli, che ha sez gudagnà ina medaglia tar ils gieus l’onn 2010 a Vancouver, ha pudì crear in'atmosfera stupenta tranter las varga 110 sportistas e sportists ch'eran questa giada da la partida. Per betg laschar vegnir si in uschenumnà coller da champ, ha Stöckli adina puspè organisà eveniments sper il sport. Uschia per exempel al di naziunal in concert virtual cun il musicist Aaron da Rapperswil. Dasperas trametta Stöckli adina puspè SMS a tut la delegaziun cura ch'i dat ina medaglia svizra, e da quellas ha quai dà numerusas.

Emprima medaglia – tun da partenza

In auter punct impurtant è per exempel er l’emprima medaglia da la tiradura Nina Christen en l’emprima da varga 330 decisiuns da medaglias. Quai è per uschè dir stà il tun da partenza en la campagna olimpica ch'è stada curunada d'in grond success. E per finir lura anc il svilup da l’entira equipa durant ils davos onns e l'avantatg che sportistas e sportists svizzers han pudì trenar durant la pandemia senza grondas restricziuns.

Viola Amherd engrazia per la prestaziun

La ministra da sport Viola Amherd ha per la finiziun dals gieus olimpics engrazià a las atletas ed atles per lur prestaziun. Els hajan fatg grond plaschair a la populaziun cun lur grondiusas prestaziuns, scriva la cussegliera federala en ina brev averta.

Anc mai han atletas svizras gudagnà uschè bleras medaglias. Ella saja stada mintga giada emoziunala ed avess il pli gugent branclà las atletas ed atlets, uschè Amherd. La cussegliera federala ha era onurà las persunas che sustegnan las sportivas e sportivs en lur mintga di, per exempel geniturs u la glieud en uniuns ed associaziuns.

video
Il facit da Tokio 2020
Or da Giuventetgna dals 09.08.2021.
laschar ir. Durada: 3 minutas 20 Secundas.

RTR novitads 12:00

Artitgels legids il pli savens