Siglir tar il cuntegn

Header

audio
Cuira 97: Cumenzament da stagiun nuncuntentaivel
Or da Actualitad dals 07.10.2021.
laschar ir. Durada: 03:08 minutas.
cuntegn

2. liga interregiunala Cuira 97 en la miseria

La partenza en la stagiun 2021/2022 n'è betg gartegiada cun 6 puncts ord 7 gieus. Che Cuira pudess avair miserias è dentant stà previsibel.

L'ultima fin d'emna ha Cuira 97 pers ordaifer cunter il FC Widnau gist cun 1:6. Igl è stà la quarta terrada en roda. Suenter 7 gieus sa chattan ils Grischuns cun mo 6 puncts sin plazza 10 da 14 equipas.

Actualmein èsi grev da dir tge che va tut fauss.
Autur: Maximilian Knuth giugader-trenader Cuira 97

Ils resultats actuals fan tuttina surstar in zic. Las ultimas stagiuns tutgava Cuira adina tar las fermas equipas en la 2. liga interregiunala. La stagiun 2019/2020 eran els perfin sin plazza 1 cura che la stagiun è vegnida interruta ed annullada pervia dal coronavirus.

Il giugader-trenader ha spetgà greva stagiun

Maximilian Knuth ch'è dapi il cumenzament dal 2019 giugader-trenader tar Cuira ha gia avant la stagiun 2021/2022 ditg ch'i pudess vegnir in campiunadi cumplitgà. La preperaziun saja stada tut autra ch'optimala. Blers giugaders hajan mancà ed in gieu da preperaziun ha perfin stuì vegnì stritgà pervia da muncanza da giugaders. Il Tudestg da 32 onns appellescha perquai er a l'equipa che mintga soli giugader stoppia metter en dumonda sa sez.

Igl è schon da far patratgs sch'ils giugaders investeschan avunda per questa liga e per il club.
Autur: Maximilian Knuth giugader-trenader Cuira 97
Maximilian Knuth
Legenda: Maximilian Knuth Dapi il cumenzament 2019 è il Tudestg trenader da Cuira 97. RTR, GIAN CARLO CANDINAS

Cler, ballape en la 2. liga interregiunala è ballape d'amaturs. Ma tuttina spetga Maximilian Knuth in pli grond engaschi da blers giugaders.

Enavos tar il success mo sur il cumbat

Il trenader-giugader vul en ils proxims gieus puspè vesair in'equipa sin il plaz che cumbatta ensemen. Sch'ins haja ina fasa pli greva, stoppia ir sur il cumbat. E plinavant saja uras da challar da far sbagls individuals. Maximilian Knuth menziuna dentant era che la qualitad saja anc adina avant maun en l'equipa. Cler cun in Fabrizio Cavegn en l'offensiva u in Jarno Maffezzini en la defensiva hajan els pers dus giugaders da tschep la stad. Plinavant è er il goli numera 1 dals ultims onns, Marko Zuvic actualmain blessà. Il medem vala per il chapitani Carlo Bearth. Dentant sajan er giugaders da qualitad vegnids vitiers.

Cler è che Cuira 97 vegn questa stagiun ad avair da far nagut cun il cumbat per ir si en 1. liga. In cumbat cunter la relegaziun na duessia dentant er betg dar. Per gliez saja l'equipa memia ferma.

RTR actualitad 11:00

Artitgels legids il pli savens

Scrollar a sanestra Scrollar a dretga