Gia dapi ventg onns datti il Bikemaraton dal Parc Naziunal. La cursa è creschida durant ils davos dus decennis al pli grond eveniment da sport da stad en il Grischun dal Sid. Entant che autras cursas da mountainbike èn vegnidas ed era puspè sparidas, exista il Bikemaraton en Engiadina anc adina. Ed il Bikemaraton è uschè popular sco anc mai. Per il solit èn passa 2'000 curriduras e curridurs da la partida tar las differentas cursas.
Limita per avair la segirezza da planisaziun
Gia baud han ils organisaturs dal Bikemaraton decidì da limitar la participaziun per quest onn. A la cursa pon maximalmain 1'500 persunas esser da la partida. Quest dumber duss garantir ina auta qualitad da la cursa, vitiers ha ins uschia era ina tscherta garanzia da planisaziun. Independent dal fatg sch'i avess anc da dar fin la fin d'avust schluccadas da la Confederaziun pon ins uschia planisar pli segira.
Speranza ch'era l’Italia po schluccar
La cursa roiala ‘Vallader’ da Scuol en Val Müstair e da là vinavant fin a Livigno, S-chanf e puspè enavos a Scuol tutga tar il Bikemaraton sco la sella sin il velo. Per pudair ir cun la cursa en l'exteriur dovra quai anc la conferma da Livigno. Claudio Duschletta dal comité d’organisaziun è però da buna speranza che quai gartegia. Uschia pudess ins festivar la cursa da giubileum 20 onns Bikemaraton dal Parc Naziunal Svizzer a moda e maniera meritada.