Richard Carapaz gudogna sco emprim Ecuadorian il Tour de Suisse. L'um da 28 onns dal Team Ineos Grenadiers ha defendì a moda suverana ses maillot jaune en la davosa etappa roiala dad Andermatt sur ils Pass Alpsu, Lucmagn e Gottard enavos ad Andermatt.
Segund, cun 17 secundas retard, durant l'entir Tour de Suisse daventa Rigoberto Uran da la Columbia. Terz vegn l'anteriur spezialist da mountainbike, il Danais Jakob Fuglsang, quai cun in retard da 1:15 minutas.
Gino Mäder gudogna etappa roiala
Al davos di dal Tour de Suisse ha Gino Mäder procurà per la terza victoria svizra. Mäder ha gudagnà l'etappa roiala cun partenza ed arrivada ad Andermatt en in sprint final encunter il Canadais Michael Woods. Mäder è uschia il terz svizzer ch'ha gudagnà quest onn in'etappa dal Tour de Suisse. Stefan Küng aveva gudagnà l'emprim di il prolog a Frauenfeld e Stefan Bissegger la quarta etappa da St. Urban a Gstaad.
7. avla etappa: Rigoberto Uran gudogna la cursa cunter l'ura
Il Columbian Rigoberto Uran gudogna surprendentamain la segunda cursa cunter l'ura. Il ciclist da 34 onns ha distanzià sin ils 23,2 kilometers davenda Sedrun sur l'Alpsu ad Andermatt la concurrenza per passa 40 secundas.
Segund vegn il campiun mundial franzos Julian Alaphilippe e terz vegn il Svizzer Gino Mäder. Cun Stefan Küng è in segund svizzer vegnì tranter la top 10. Richard Carapaz ha defendì il maillot jaune.
6. avla etappa: Il tour arriva en Surselva – Kron gudogna
Il Danais Andreas Kron gudogna la 6avla etappa dal Tour de Suisse. El vegn bain pir sco segund en l'arrivada – perquai ch'il portugais Costa ha dentant impedì Kron en il sprint final ha la giuria da cursa declerà Kron sco victur. Meglier svizzer è vegnì il venderdi Marc Hirschi sco 15avel.
En il classament general resta l'Ecuadorian Richard Carapaz al timun cun 26 secundas avantatg sin il Danais Jakob Fuglsang. Meglier Svizzer en il classament general è Marc Hirschi sin posiziun 32 ed in retard da 13 minutas 49.
5. etappa: Carapaz gudogna l'etappa e va per il maillot jaune
Culp dubel per Richard Carapaz al Tour de Suisse. Il ciclist ecuadorian gudogna la 5avla etappa da Gstaad a Leukerbad e surpiglia er gist il maillot jaune e maina il classament general. Carapaz ha gudagnà il sprint avant il Danais Jakob Fuglsang. En il classament ha Carapaz in avantatg da 26 secundas sin Fuglsang.
4. etappa: Bissegger dominescha il sprint – van der Poel resta leader
Il Svizzer Stefan Bissegger gudogna la 4. etappa dal Tour de Suisse sur 171 kilometers da St. Urban a Gstaad. Il Turgovian da 22 onns ha realisà la victoria dal di cun ina prestaziun impressiunanta en il sprint. Segund è vegnì il Franzos Benjamin Thomas e terz l'American Joey Rosskopf. Quart cun in retard da 23 secundas sin Bissegger è vegnì cun Joel Suter in ulteriur Svizzer.
Il classament general maina vinavant il Neederlandais Mathieu van der Poel. Ses avantatg sin il segund, il Franzos Julian Alaphilippe, è be ina secunda. Terz è Stefan Küng cun in retard da 4 secundas.
3. etappa: Van der Poel gudogna e surpiglia il tricot da leader
Mathieu van der Poel ha gudagnà suener la segunda er la terza etappa dal Tour de Suisse. Quella ha manà il mardi sur 183 kilometers da Lachen a Pfaffnau. Segund è vegnì il Franzos Christophe Laporte e terz ses cumpatriot Julian Alaphilippe. Meglier Svizzer è stà Marc Hirschi. El è vegnì 18avel.
Perquai che van der Poel ha gudagnà aifer 24 uras duas etappas, ha el survegnì 10 secundas bonus e perquai sto uss il Svizzer Stefan Küng dar giu il tricot da leader. Küng è uss cun in retar da quatter secundas sin il Neerlandais terz, suenter Julian Alaphilippe.
2. etappa: Van der Poel gudogna – Küng maina il tour
Mathieu van der Poel ha gudagnà la segunda etappa dal Tour de Suisse a Lachen - quai cun in avantatg dad 1 secunda avant il Tudestg Maximilian Schachmann. Terz è vegnì il Neerlandais Wout Poels. Meglier Svizzer è Marc Hirschi sco quart. Sco il Franzos Julian Alaphilippe ha er Hirschi pers quatter secundas sin il victur.
Stefan Küng che ha gudagnà la dumengia la cursa cunter l'ura è vegnì oz 25avel el ha dentant defendì il tricot da leader. Küng maina uss il Tour de Suisse cun in avantatg dad 1 secunda sin il il campiun mundial Julian Alaphilippe.
1. etappa: Küng gudogna avant Bissegger
L'emprim leader dal 84avel Tour de Suisse è Stefan Küng. Il ciclist da 27 onns da la Turgovia ha gudagnà la cursa cunter l'ura sur 11 kilometers a Frauenfeld cun in avantatg da 4 secundas sin il segund, ses cumpatriot Stefan Bissegger. Terz è il Talian Mattia Cattaneo cun in retard da 12 secundas.
Glindesdi è la segunda etappa dal Tour de Suisse, sur 178 kilometers. Quai davent da da Neuhausen fin a Lachen.
