Siglir tar il cuntegn

Header

audio
Reportascha dal gieu CB Trun/Rabius – CB Surses 2:2.
Or da Actualitad dals 09.05.2022.
abspielen. Laufzeit 4 minutas 9 Sekunden.
cuntegn

3. liga: derbi rumantsch Trun/Rabius e Surses partan ils puncts

Al CB Trun/Rabius n’èsi betg reussì da far revantscha per la terrada dad 1:2 la fin settember a Surses. L’equipa da la Cadi ha stuì sa cuntentar cun in pari da 2:2 a chasa encunter il CB Surses.

Durant ch’il CB Surses ha dominà avant pausa ha il CB Trun/Rabius dictà il gieu suenter pausa. Cumenzà ha il gieu cun ina duscha fraida per il favurit da la Cadi. Gia en la 6avla minuta grategi a Surses da sajettar l’emprim gol, quai cun in bel sajet da distanza. Curt avant pausa, en la 43avla minuta, augmenta Surses al 2:0. En questa emprima mesadad n’ha Trun/Rabius chattà nagin recept co franar ils Surmirans.

audio
Rapport dal gieu CB Trun/Rabius – CB Surses 2:2
aus Sport ed actualitad vom 08.05.2022.
abspielen. Laufzeit 3 minutas 40 Sekunden.

En la pausa han ils trenaders da Trun/Rabius sco i para chattà ils dretgs pleds. En las segunda mesadad han ils Sursilvans numnadamain mussà tut in’autra fatscha. En la 61avla minuta reusseschi a Patrizio Decurtins da marcà il 1:2 cun il chau suenter in corner. Bun 10 minutas pli tard egualisescha Beat Cadruvi al 2:2, in gol ch’è capità suenter in virivari avant il gol da Surses.

audio
Reacziuns dals dus trenaders e dals dus chapitanis
aus Sport ed actualitad vom 08.05.2022.
abspielen. Laufzeit 13 minutas 54 Sekunden.

In punct che cuntenta nagin

A la fin hai dà in punct per mintga equipa. Dal tut cuntent cun quest resultat n’è dentant nagin. Surses ha manchentà da far in pli grond pass direcziun il stritg da la tabella ed er il CB Trun/Rabius che veva pers ils davos dus gieus da campiunadi na vegn er betg da far in grond sigl enavant en la tabella. Trun/Rabius resta numnadamain sin il 7avel plaz cun 23 puncts. Il CB Surses resta sin il 11avel plaz cun 13 puncts ed uschia sin in plaz da relegaziun. Il dischavantatg sin il stritg munta a 3 puncts.

ballape
Legenda: RTR, Andreas Wieland

Sin Surses spetga gia il proxim derbi

La proxima fin d’emna, la dumengia, ils 15 da matg, dat il CB Trun/Rabius ses proxim gieu da chasa encunter il FC Eschenbach che sa chatta actualmain sin il segund plaz da la tabella. Il CB Surses retschaiva a chasa il CB Lumnezia ch'è a la cua da la tabella cun be 2 puncts ord 17 gieus da campiunadi. Ils Surmirans pon uschia sa legrar sin il proxim derbi grischun e rumantsch en questa 3. liga.

RTR actualitad 17:00

Artitgels legids il pli savens

Scrollar a sanestra Scrollar a dretga