Marco Odermatt ha gronda schanza da gudagnar la gronda culla da cristal, vul dir el fiss il victur dal classament general da la cuppa mundiala. El fiss l'emprim Svizzer dapi 12 onns che gudogna quella. El ha 319 puncts avantatg sin il Norvegais Alexander Kilde. Quest'emna al final da la stagiun a Courchevel/Méribel datti bain maximalmain 400 puncts da gudagnar. Per quai stuess Kilde dentant gudagnar tut las quatter concurrenzas, cursa rapida, super-g, slalom gigant e slalom. Kilde n'ha fatg nagins slaloms gigants quest enviern ed è anc mai ì in slalom en la cuppa mundiala.
Odermatt avess cunquai la culla pitschna dal slalom gigant, la culla gronda ed el è era anc campiun olimpic en il slalom gigant.
La dumengia è Odermatt vegnì terz al slalom gigant a Kranjska-Gora. Gudagnà la cursa ha il Norvegiais Henrik Kristoffersen, segund è l'Austriac Stefan Brennsteiner. Gino Caviezel è vegni 6avel, Loic Meillard 9avel, Justin Murisier 14avel e Thomas Tumler ha la segunda gada en quest enviern fatg puncts cun ses 22avel plaz.
