Avant bun tschintg onns è ida a fin ina era tut spezial per il Club da hockey da Tavau – suenter 22 onns ha il trenader Arno Del Curto bandunà il HCD. Dapi lura èsi vegnì ruassaivel enturn il trenader da cult. El ha scrit in cudesch sur da sia carriera ed è mintgatant da vesair sco trenader assistent e cussegliader a la banda da la naziunala da hockey da l'Austria.
Intervistas n'ha el dà naginas dapi ch'el ha chalà a Tavau. Per RTR ha el fatg ina excepziun.
Arno Del Curto sa regorda da blers bels onns tar il club da Tavau. A la fin n'haja el dentant betg pli pudì, el eria stanchel, pli che stanchel.
Jau hai pensà che jau possia lavurar di e notg, 24 uras. Ma quai n'era betg uschia. Jau n'hai semplamain betg sentì quai.
Impressiun han ils fans fatg ad el. Oravant tut a la fin, cura ch'i na funcziunavia betg pli endretg, hajan ils fans anc adina sustegnì el. Ed era cun ils giugadurs haja el gì bun. Quels savevian ch'il vegl battia avant e durant ils gieus e suenter saja mintgamai puspè stà bun.
Musica
Adina impurtant saja era stà la musica. Cun tuns da Led Zeppelin haja el motivà il team da dar tut. Uss cun dapli temp vuless el anc emprender da sunar perfetg clavazin – i vegnia mo savens insatge tranteren.
