L'aventura olimpica a Sapporo, l'onn 1972, n'emblida Gaudenz Beeli da Flem mai. Ed aventurus èsi stà en plirs reguards. Senza experientscha ha el prendì plaz sco franader en il bob a quatter dal pilot Hans Candrian. Suenter ils success sco campiun mundial e medaglia da bronz olimpica a Grenoble, era quel a la tschertga d'ina nov'equipa. Trenaments regulars ed intensivs han la finala laschà daventar realitad il siemi olimpic. Gaudenz Beeli, sco noviz da bob, era tuttenina entamez quella gronda famiglia olimpica.
Diplom empè d'ina medaglia
Era sch'il bob «Svizra II» è stà en dus dals quatter percurs il pli svelt da tuts ed ha perfin realisà il record da temp en il vial da bob olimpic a Sapporo, è be sa resultà plazza quatter. In diplom cun in tif amar sa regorda Gaudenz Beeli. Naiv en il vial da bob, durant in dals quatter percurs, ha impedì la medaglia, forsa perfin quella dad aur.
Nus vessan en sasez duì e stuì far recurs
Suenter il bab era la figlia
Ils gieus olimpics d'avant 50 onns a Sapporo èn stads ils emprims ed ultims per Gaudenz Beeli sco atlet. Daventar profi en il sport da bob n'è mai stà ina opziun. Tuttina è el anc ina giada stà part da quella gronda famiglia olimpica. L'onn 2006 a Torino sco trenader da l'equipa da curling da las dunnas cun il skip Mirjam Ott. Part da quell'equipa è era sia figlia Binia Feltscher-Beeli stada. Betg sco laica sco ses bab, mabain sco profi. E 34 onns suenter Sapporo ha Gaudenz Beeli pudì vesair e sentir co ch'igl è da gudagnar ina medaglia olimpica. Las curlistas e lur trenader èn turnads cun argient olimpic en il Grischun, en Surselva, a Flem.
