Schurter puspè leader al Cape Epic

Suenter la 5avla etappa dal Cape Epic en l’Africa dal Sid è il duo svizzer cun Nino Schurter e Lars Forster puspè a la testa dal classament general.

Nino Schurter e Lars Forster Bild in Lightbox öffnen.

Legenda da maletgs: Nino Schurter e Lars Forster èn puspè a la testa dal classament general. Keystone

Ils Svizzers èn vegnids segunds en la 5avla etappa sur 100 kilometers cun 2’850 meters differenza d’autezza fin a Stellenbosch. Schurter e Forster han la finala schenghegià la victoria d’etappa al duo cun Philip Buys e Beukes Matthys. Ils dus sidafricans èn stads durant l’entira etappa a la testa ensemen cun Nino Schurter e Lars Forster.

Schurter e Forster en il maillot jaune

Il Brasilian Henrique Avancini ed il Tudestg Manuel Fumic ch’èn anc partids sco leaders en questa 5avla etappa han pers sis minutas ed han la finala cuntanschì l’arrivada sco quarts. Cunquai maina il duo svizzer cun Schurter e Forster puspè il classament general cun in avantatg da tschintg minutas sin Manuel Fumic e Henrique Avancini.

Nino Schurter e Lars Forster eran gia stads durant ils emprims trais dis ils leaders da questa cursa extrema en l’Africa dal Sid. Suenter avair gudagnà il prolog e las emprimas duas etappas eran Schurter e Forster dentant vegnids franads en la terza etappa pervia d’in defect tecnic.

Il Cape Epic, che vala sco la pli dira cursa da mountainbike sur pliras etappas, va a fin la dumengia a Paarl en la vischinanza da Kapstadt.

RR novitads 10:00