Questa decisiun n'è betg mo ina consequenza da las dispitas dals davos mais mabain ha era da far insatge cun la situaziun sportiva. La situaziun insupportabla tar la Federaziun svizra da gimnastica ha cumenzà l'october passà. Duas anteriuras atletas han crititgà l'atmosfera al center da sport naziunal a Magglingen ed era fatg renfatschas als scheftrenader Fabien Martin.
Pretensiuns da las atletas sajan stadas crediblas
L'examinaziun haja mussà ch'il scheftrenader ch'era da quel temp en uffizi, n'haja betg resguard a moda suffizienta sia responsabladad psichica e fisica envers il bainstar da las atletas. El n'haja betg sustegnì avunda las atletas.
Ellas avevan ditg, ch'i sajan vegnidas messas sut in squitsch enorm e per part saja er vegnì smanatschà ad ellas. Las pretensiuns da las altletas sajan credilas ha ditg Daniel Mägerle, il president da la cumissiun etica da la federaziun. Las pretensiuns dal scheftrenader sajan percunter stadas per part cuntradictoricas. Tenor la cumissiun d'etica saja perquai probabel che las renfatschas da las atletas sajan er propi verdaivlas e ch'i saja capità sco las atletas hajan descrit.
La cumissiun d'etica ha tranter auter recumandà a la federaziun da midar ora l'entir team da treanders. Mägerle ha accentuà vinavant che nagina culpa tutgia las duas atletas. Ellas hajan gì il dretg da purtar a la glisch l'abus.