Dapi la stagiun vargada collavureschan las equipas da hockey en Engiadina en il sectur dals juniors. La finamira da questa collavuraziun è da porscher en mintga vegliadetgna ina equipa che fa part ad in campiunadi. Uss vegn tar la collavuraziun da las equipas da hockey en Engiadina fatg il proxim pass. Alexander Aufderklamm daventa l’emprim trenader da questas equipas da juniors. El duess far reclama per quest sport e manar enavant il project.
Emprimas equipas han gia dà ils emprims gieus
La mancanza da giuvens giugaders da hockey è in problem permanent en Engiadina e las valladas dal sid. Per garantir ina squadra en mintga vegliadetgna han las equipas da hockey en Engiadina e las valladas dal sid decidì da collavurar en il sectur dals juniors. Uschia èsi pli facil da vegnir ensemen cun ina squadra, per exempel sut quindesch onns, che sa far part ad in campiunadi. Ils giugaders vegnan lura simplamain dal EHC San Murezzan, dal EHC Samedan u dal Cdh Engiadina. Ensemen furman els ina equipa en ina da las differenzas categorias da vegliadetgna.
Far il proxim pass
Alexander Aufderklamm surpiglia davent da la primavaira sia funcziun sco trenader da las equipas da juniors da las squadras che collavuran en Engiadina. El deriva dal Tirol dal Sid è na ha uschia naginas colliaziuns cun ina equipa indigena. Per ils iniziants dal EHC San Murezzan èsi stà impurtant che Aufderklamm po quasi cumenzar da scriver sia istorgia sin in fegl alv. Durant l’emprim onn vegn il nov trenader pajà dal EHC San Murezzan cun sustegn da sponsurs e fauturs. En futur ves’ins alura co che quai duess vegnir reglà.
