Mohamed Elyounoussi cun il numer 24 marca il 1:0 per Basilea. Keystone

Il FC Basilea fa uschia per la terza giada en l'istorgia dal club il pass en ils otgavelfinals da la Champions League. Cun la victoria da 2:0 cunter Benfica han ils da Basilea defendì la plazza dus en la tabella. A ZSKA Moscau percunter n'èsi betg gartegià da far in exploit cunter Manchester United, ils Russ perdan cun 1:2.

A Lissabon ha tut funcziunà en favur dal FCB. Mohamed Elyounoussi ha sajettà ils giasts gia en la 5avla minuta cun il chau en avantatg, sin ina flanca da Michael Lang. E Dimitri Oberlin ha fatg il 2:0 medemamain cun il chau en la 65avla minuta, suenter in culp liber da Dario Zuffi.

Era dus clubs talians qualifitgads

Dasper il FC Basilea e Manchester United, èn era anc sa qualifitgads questa saira dus clubs talians per la fasa da k.o. da la Champions League. Juventus Turin gudogna cun 2:0 cunter Olympiakos Piräus, e la AS Roma battan a chasa Karabach cun 1:0. Tratg la sort tgi che frunta sin tgi en ils otgavelfinals, vegn glindesdi che vegn.

RR Novitads 23:00