Armon Orlik - Dapi 100 dis retg – tge è sa midà

La dumengia saira dals 31 d’avust 2025 ha Armon Orlik encurunà sia carriera cun il titel da retg da lutga. Per il lutgader da Maiavilla è in siemi ì en vigur. Il temp suenter la festa federala è dentant stà quasi uschè intensiv sco la festa sezza.

Ils davos bun trais mais è Armon Orlik stà dumandà. Qua in termin, là in inscunter – tut ch’ha vulì insatge dal nov retg da lutga. Mo uschiglio na saja betg sa midà bler en sia vita, uschia il lutgader da 30 onns. El è però daventà anc pli popular ed è uss anc dapli en il focus.

Il titel da retg da lutga è er finanzialmain lucrativ. Il taur Zibu haja el pudì vender per in bun pretsch e cun quest titel saja er pli simpel da prolungar contracts cun sponsurs u gudagnar novs sponsurs. Per Armon Orlik è dentant adina stà cler che sch’el gudognia in di quest titel ch’el giaja er vinavant a lavurar en in pensum parzial.

Er sportiv n’è betg sa midà bler. Dapi bun in mais ha Orlik puspè cumenzà a trenar, quai sco usità, fitg disciplinà e consequent, e quai cun la medema glieud. Orlik resta fidaivel a ses trenader atletic Robin Städler, l’Engiadinais ch’ha contribuì bler a quest success. La finamira è da defender il titel da retg da lutga il 2028 a Thun.

Tecnica, disciplina e spiert da gruppa – trenar la nova generaziun

Era sch'i manca en sasez il temp dapi ch'Armon Orlik è daventà retg lutgader, èsi per el impurtant da tuttina chattar il temp per ils uffants. Uffants che filan vi da lur tecnica da lutgar e siemian dad in bel di era daventar in lutgader federal e forsa perfin retg.

En la halla da lutga a Vaz Sut ha Armon Orlik trenà cun var 30 mattatschs e perfecziunà cun els la tecnica e las bittadas tradiziunalas en il sport da lutga.

Il retg punctuescha ch'el veglia dar enavos a la generaziun futura in zic da tut quai ch'el haja profità sco mat e giuvenil cun far il sport da lutga.

Or da l'archiv: