Al meeting Diamond-League a Eugene en ils Stadis Unids ha Mujinga Kambundji pudì festivar in grond success. La sprintra bernaisa ha distanzià la ferma concurrenza sur 200 meters, e gudagnà la cursa en 22,06 secundas. Ses agen record svizzer avess ella uschia meglierà per dus dieschavels. Dentant na quinta il temp da record betg, perquai ch'il vent è stà cun 2,4 m/s memia ferm.
Cumplettà il podest sur 200 meters han l’Americana Gabrielle Thomas e la Brita Dina Asher-Smith. Al medem meeting è Kambundji vegnida setavla sur ils 100 meters.