Siglir tar il cuntegn

Header

cuntegn

Atletica leva Return fulminant d'Annik Kälin

Annik Kälin, l'atleta da Grüsch, ha gist en ses emprim meeting da heptatlon, suenter ina lunga pausa pervia da problems cun il dies, briglià cun in nov record svizzer da 6'398 puncts. Quai record a Grossetto munta era gist la qualificaziun per il campiunadi europeic d'atletica leva da questa stad.

Per 7 puncts ha Annik Kälin meglierà il record svizzer che Géraldine Ruckstuhl aveva realisà avant 4 onns. Cun ils 6'398 puncts ha l'atleta da Grüsch fatg 228 dapli che quai ch'ella aveva fin uss dumagnà. Annik Kälin, ch'è vegnida 22 onns veglia la fin avrigl, ha cun quest record svizzer e la qualificaziun per il campiunadi europeic, gist fatg a sasezza in regal d'anniversari.

audio
Annik Kälin persvada cun record svizzer
ord Actualitad dals 07.05.2022.
laschar ir. Durada: 4 minutas 2 Secundas.

In heptatlon èn las 7 disciplinas

Avrir la box Serrar la box
  • 100m currer obstachels
  • 200m sprint
  • 800m currer
  • sigl en aut
  • sigl en lung
  • bittar la lantscha
  • stuschar la culla

Il meeting en l'Italia, a Grossetto, è stà per Annik Kälin ses emprim suenter la pausa sfurzada da passa in onn. Ses ultim pentatlon era perfin 20 mais enavos. L'onn passà, la primavaira, al campiunadi europeic da las U23, è ses dies sa bloccà durant la cursa d'obstachels. Il campiunadi europeic è stà a fin gia suenter l'emprima disciplina. Annik Kälin, ch'aveva lura anc schanzas intactas da sa qualifitgar per ils gieus olimpics a Tokio, ha stuì ceder. Ensemen cun ses bab, ch'è era ses trenader, ha ella tratg il frain. Decidì da prender il temp ch'i dovria per rehabilitar, lavurar vid ses punct flaivel, il dies, e metter in pau auter focus e finamiras.

Potenzial per anc dapli

La prestaziun a Grossetto cun il record svizzer e la qualificaziun per il campiunadi europeic è la conferma, ch'Annik Kälin ha fatg bler endretg durant sia absenza sfurzada. Ella è turnada anc pli ferma ed en 3 da las 7 disciplinas realisà records persunals. Ina prestaziun solida, di la giuvna da Grüsch. Dentant saja en tut las disciplinas anc pussaivel dapli.

Anc bleras finamiras

Per Annik Kälin è adina stà cler ch'ella vegnia a cumbatter e far tut per turnar e far sport sin aut livel. Ella ha anc bleras finamiras. Sper il campiunadi europeic da l'avust a Minca ha ella era bunas vistas da sa qualifitgar per il campiunadi mundial d'atletica leva ch'è il fanadur en ils Stadis Unids. Ed era ils gieus olimpics il 2024 a Paris èn per Annik Kälin dapli che be in siemi. Ses proxim heptatlon è fin matg a Götzis en il Vorarlberg.

RTR novitads 20:00

Artitgels legids il pli savens