Ulteriurs temps fabulus als gieus olimpics a Tokio: La curridra d'obstachels dals Stadis Unids, Sydney McLaughlin ha gudagnà la cursa sur 400 meters obstachels cun in temp da 51,46 secundas ed è cun quai stada per 44 tschientavels pli sperta che da ses agen record mundial dal zercladur 2021.
Er la segunda, sia cumpatriota e victura olimpica da Rio, Dalilah Muhammad è stada cleramain sut il vegl record mundial. E l'Ollandaisa Femke Bol ha realisà sco terza in nov record europeic (52,03 secundas). Gia mardi aveva il Norvegiais Karsten Warholm gudagnà sur 400 meters obstachels cun in nov record mundial.
Naginas Svizras en final
Auter ch'anc al campiunadi mundial il 2019 a Doha ha il final a Tokio gì lieu senza participaziun svizra. Per Léa Sprunger è l'aventura stada a fin suenter il mezfinal.