L'Austriaca Anna Kiesenhofer procura per ina sensaziun en la cursa da velo sin via. Cun gudagnar la medaglia dad aur surpassa Kiesenhofer las favuritas ollandaisas e distanziescha la concurrenza per passa ina minuta e dapli. Argient va a l'Ollandaisa Annemiek van Flöten, bronz a la Taliana Elisa Longo Borghini.
Avant la cursa han tuts discurrì da las favuritas ollandaisas. La naziun da velo che ha fin ussa gudagnà a gieus olimpics quatter da nov medgalias d'aur. Per ina giada n'han las Ollandaisas dentant betg giugà la rolla principala. Lezza ha surpiglià l'Austriaca Anna Kiesenhofer. La ciclista da 30 onns ha attatgà gist a la partenza e furmà ina gruppa da l'emprima tschintg ciclistas, pli tard lura anc trais. Radund 40 km avant la fin ha Kiesenhofer attatgà danovamain e pudì sa deliberar da la Polaca Anna Plichta e l'Israeliana Omer Shapira.
A la fin da sias forzas ha l'Austriaca cuntanschì sco emprima il final suenter 137 km cun tschintg premis da culm.
Reusser spera sin la cursa cunter l'ura
La Svizra Marlen Reusser ha terminà la cursa sin plaz 46 – cun in retard da bunamain 10 minutas. La suletta Svizra en la cursa n'ha gì naginas schanzas. Per la Bernaisa da 29 onns è la cursa cunter l'ura il highlight dals gieus olimpics. En questa disciplina ha ella gudangà l'onn passà la medaglia d'argient al campiunadi mundial.
