La raccolta da Gina Berther, oriunda da Rueras, è stada magari gronda als campiunadis mundials d'auzar pais ad Amsterdam en ils Pajais Bass. Uschia scriva la plattafurma da novitads rumantschas FMR. Als campiunadis mundials da «powerlifting», ch'han gì lieu da venderdi passà enfin dumengia, hai dà medaglias en trais disciplinas. En tuttas trais hai dà ina per la Sursilvana.
Aur en auzar sur crusch ed or da la schanuglia
Suenter ses emprim titel da campiunessa mundiala, l'onn passà sin l'insla taliana da la Sardegna, è Gina Berther (29) sa participada als campiunadis da quest onn sco favurita. Ella ha fatg tutta onur a questa rolla e gudagnà aur en las disciplinas d'auzar sur la crusch ed or da la schanuglia. Cumplettà questas duas victorias ha Berther cun la medaglia d'argient en la disciplina d'auzar pais giu dal baun. La Tuatschina ch'è sa participada en la categoria d'enfin 70 kg è cuntenta cun sias prestaziuns, sco quai ch'ella ha tradì a la FMR:
Cun las prestaziuns dals emprims dus dis sun jau fitg cuntenta. Cun la concurrenza d'auzar sur la crusch, la dumengia, na sun jau betg dal tut cuntenta, malgrà l'emprim plaz.
En la disciplina d'auzar sur crusch aveva Gina Berther cuntanschì l'onn passà il record mundial da sia categoria. Quai cun auzar 195 kg. La finamira quest onn era d'auzar 200 kg.
Jau hai fatg il meglier pussaivel, ma en il futur vi jau mussar tge che mias chommas pon propi auzar.
En il trenament ha Berther auzà gia pliras giadas 200 kg. Suenter ils success dals dis passads giauda la Tuatschina ussa l'emprim ina giada intgins dis da vacanzas a Rueras, avant ch'ella va puspè en il Vallais, d'ina vart a lavurar sco vendidra d'immobiglias e da tschella vart a trenar en il center da fitness per proximas concurrenzas.
Or da l'archiv:
