Il pilot da Ferrari, Charles Leclerc gudogna l'emprima cursa da la stagiun a Bahrain. Il Monegass ha vargà en la fasa finala ses collega da team Carlos Sainz. Il campiun mundial, Max Verstappen ha stuì metter giu ses auto da Red Bull trais rundas avant la fin en la boxa.
Leclerc ha pudì festivar dumengia sia terza victoria en in Grond premi. Per Ferrari èsi stà l'emprima victoria en la furmla 1, dapi il triumf da Sebastian Vettel il 2019 a Singapur, avant 910 dis. Lewis Hamilton ha profità en l'ultima runda d'ina vulvida da Sergio Perez en l'auter Red Bull. Uschia è in dals Mercedes anc vegnì sin il podest.
Ils dus Red Bull han omadus gì problems tecnics che han la finala custà ad els ils puncts. Pertge els eran omadus en las plazzas davantvart.
Omadus Alfas en ils puncts
Mick Schumacher en il Haas ha gì ina collisiun cun il manischunz da Alpine, Esteban Ocon. Uschia n'è el betg pli vegnì sur plazza 11 or. Il team da Alfa Romeo è vegnì en l'emprima cursa suenter la gronda revoluziun da reglas, cun omadus autos en ils puncts. Valtteri Bottas sco sisavel ed il nov manischunz en la furmla 1, Zhou Guanyu sco 10avel. Uschia han els dus rimnà nov puncts per la squadra da Hinwil.