Cun il CB Trun/Rabius è la cuppa svizra da ballape er a fin per il davos club grischun ch'era anc da la partida. Ils Sursilvans han pers il gieu da quartfinal da la prerunda per la Cuppa svizra ordaifer encunter il FC Wittenbach cun 0:6. Da pausa stevi 0:2 en quest duel tranter duas equipas da terza liga.
Las meglras equipas grischunas sco Cuira 97 che dat en la 2. liga interregiunala u l'US Schluein Glion che dat en la 2. liga regiunala eran gia crudadas ora da la cuppa svizra durant la runda d'atun.
Il campiunadi cuntinuescha
En in'emna cumenzan lura ils campiunadis da ballape en las ligas regiunalas. L'US Schluein Glion che sa chatta a la cua da la tabella suenter la runda d'atun frunta en ses emprim gieu quest onn a chasa sin Il FC Mels, il leader en 2. liga. Il gieu ha lieu la sonda, ils 26 da mars.
Il CB Trun/Rabius dat ses emprim gieu en 3. liga ordaifer encunter Tusaun-Cazas ed il CB Surses fa il viadi tar Valposchiavo Calcio. Omadus gieus èn la sonda, ils 26 da mars. Per la terza equipa rumantscha en 3. liga, il CB Lumnezia, cuntinuescha il campiunadi pir ils 3 d'avrigl ordaifer cunter Tusaun-Cazas.