Siglir tar il cuntegn

Header

audio
Golia Livia Peng mida en Spagna
Or da Actualitad dals 06.01.2023.
laschar ir. Durada: 3 minutas 2 Secundas.
cuntegn

Ballape da dunnas Livia Peng da nov tar Levante UD

La golia da Domat dat danovamain ballape en la liga spagnola. Suenter mo in mez onn banduna ella pia il club BK Häcken. Tar ils Svedais è la Grischuna mo stada sporadicamain sin il plaz ils ultims mais.

Livia Peng vala sco grond talent en gol. Perquai ha ella er fatg la stad passada la midada davent dal FC Turitg tar il topclub svedais BK Häcken. Mo, suenter mo 6 mais fa la golia da 20 onns schon puspè midada. Cun Levante ha ella chattà uss in topclub en Spagna. Il club da la citad da Valencia è actualmain sin plazza 2 davos il leader Barcelona.

Finamira è il campiunadi mundial

Tar BK Häcken n'ha Livia Peng betg gì simpels mais. La concurrenza è stada gronda cun la golia naziunala da la Svezia, Jennifer Falk. Uschia ha la Grischuna sulettamain dà trais gieus da campiunadi ed in gieu da cup per il club. Quai è in dals motivs daco che ella bandunia gia suenter in mez onn puspè il club.

Livia Peng durant in trenament per la naziunala
Legenda: Livia Peng durant in trenament per la naziunala Keystone

Sia gronda finamira è numnadamain il campiunadi mundial dals 30 da fanadur fin ils 30 d'avust en l'Australia e la Nova Zelanda. Per esser da la partida dovra Livia Peng temp da gieu. E las ambiziuns èn grondas tar la golia da 20 onns.

Mia gronda finamira è dad esser en gol tar il campiunadi mundial
Autur: Livia Peng Golia da ballape

La giuvna da Domat na vul betg simplamain esser da la partida. La finamira saja dad esser en gol durant il turnier. Tar il campiunadi d'europa la stad passada en l'Ingalterra è Livia Peng anc stada golia numera 3 davos Gaëlle Thalmann e la Rumantscha Seraina Friedli.

Artitgels legids il pli savens