Franco Foda è il nov trenader dal Club da ballape da Turitg. Il Tudestg ha suttascrit in contract da dus onns tar il FCZ. Tar il campiun svizzer daventa el successur da ses cumpatriot André Breitenreiter ch'ha midà a Hoffenheim.
Fin la primavaira passada ha Franco Foda (56) trenà la squadra naziunala austriaca ch'el aveva surpiglià il 2017 da ses antecessur Marcel Koller. Cun la naziunala austriaca è Foda sa qualifitgà il 2021 per il campiunadi europeic, nua ch'i han cuntanschì ils 8avels finals. En ils playoffs per il campiunadi mundial a Katar ha l'Austria pers encunter Wales il mars passà.
Gia avant aveva Foda trenà squadras austriacas ed ha manà il FC Graz al titel da campiun (2011). Giugà ha Foda tranter auter tar Kaiserslautern, Bayer Leverkusen e Stuttgart – ed il 1997 era in pèr partidas tar il FC Basilea.