Siglir tar il cuntegn

Header

cuntegn

Ballape Messi: meglier giugader da ballape 2023

Lionel Messi è per l'otgavla giada vegnì undrà sco meglier ballapedist dal mund. La Federaziun da ballape mundiala FIFA ha undrà l'Argentin glindesdi saira a Londra. Era nominads per il premi èn stads il Norvegiais Erling Haaland ed il Franzos Kylian Mbappé.

La cursa tranter Messi e Haaland è entant stada stretga. Dals trenaders da las echipas naziunalas, dals giugaders e dals fans han ils dus survegnì tuttina blers puncts. Fatg la differenza han la fin finala las vuschs che Messi ha survegnì dals capitanis da las echipas naziunalas. Era il capitani da l'echipa naziunala svizra Granit Xhaka ha elegì Messi avant Haaland e Mbappé. Il trenader da la naziunala svizra Murat Yakin ha elegì Messi avant l'Argentin Julian Alvarez e Mbappé. Messi ha survegnì il premi malgrà ch'el n'ha l'onn passà gudagnà nagins titels impurtants. L'Argentin era era vegnì undrà sco meglier giugader da ballape dal mund l'onn passà ed avant gia 6 giadas. L'atun passà aveva Lionel Messi gia survegnì il «Ballon d'Or», il premi che schurnalistas e schurnalists dattan al meglier giugader da ballape dal mund.

Onur per Bonmati, Ederson, Earps

Sco megliera giugadra da ballape dal mund ha la FIFA undrà la Spagnola Aitana Bonmati, ch'era vegnida campiunessa mundiala cun l'echipa naziunala spagnola e ch'aveva gudagnà la Champions League cun l'FC Barcelona. Era Bonmati era l'onn 2023 vegnida undrada cun il «Ballon d'Or».

Sco meglier goli dal mund è vegnì undrà a Londra il Brasilian Ederson che gioga tar Manchester City. Megliera golia dal mund è la golia da l'echipa naziunala englaisa Mary Earps.

Per la segunda giada Pep Guardiola

Il premi sco meglier trenader dal mund ha survegnì il Spagnol Pep Guardiola, ch'è vegnì undrà per la segunda giada suenter l'onn 2011. Guardiola ha gudagnà l'onn passà cun Manchester City il campiunadi englais, la cuppa englaisa e la Champions League. Undrada sco megliera trenadra è vegnida per la quarta giada l'ollandaisa Sarina Wiegman.

audio
Per tadlar: las novitads da las 08:00
ord RTR Audio dals 16.01.2024.
laschar ir. Durada: 5 minutas 1 Secunda.

RTR novitads 06:00

Artitgels legids il pli savens