2. liga interregiunala
Suenter la terrada cunter il FC Wil la fin d'emna passada, ha Cuira 97 dà tut sin il plaz en l'Obere Au en il duel cunter il segund da la tabella SV Schaffhausen cun 1:0.
Per Cuira 97 na munta quai però betg ina midada en la tabella. I restan cun ussa 17 puncts anc adina gist sur il stritg - pon però distanziar Seuzach ch'è cun 12 puncts gist sut il stritg.
Resultats 2. liga interregiunala
2. liga, gruppa 1
En la gruppa 1 da la segunda liga fa la US Schluein Glion in pari cunter il FC Abtwil-Engelburg cun 2:2. Per la US Schluein Glion na midi però nagut en la tabella: I restan sin il 12avel ed ultim plaz, 5 puncts suenter il FC Montlingen.
Il FC Domat ha stuì ceder al KF Dardania Son Gagl. Sin l'agen pastg da la EMS-Arena Vial hani pers 2:3. Quai munta che Dardania Son Gagl è ussa a la testa da la tabella, ed il FC Domat resta sin plaz 10, gist anc sur il stritg e mo 1 punct sur il FC Montlingen.
Resultats 2. liga
3. liga, gruppa 1
Il derby grischun en l'emprima gruppa da la 3. liga han ils Puschiavins decidì a chasa sin il plaz Casai a Campascio. Il terz da la tabella – Valposchiavo Calcio – gudogna cun 3:1 encunter il CB Lumnezia ch'è a la cua da la tabella. En la tabella na mida quest resultat nagut.
Il FC Tusaun Cazas gioga in pari cunter il FC Bad Ragaz cun 1:1. Bad Ragaz po uschia vegnir a la testa da la tabella, entant che Tusaun Cazas resta sin plaz tschintg.
Era il CB Trun/Rabius gioga in pari. Encunter il FC Sargans fani in 2:2 e restan uschia sin plaz 4 en la tabella, entant che Sargans va in plaz ensi (7avel).
Il FC Landquart ha stuì ceder al FC Uznach. Ordaifer perdani cun 1:3. Uschia croda Landquart sin plaz 9 da la tabella cun ses 17 puncts, entant che Uznach gudogna 3 plazzas e va sin plaz 6 da la tabella.
Era cun 1:3 sto il CB Surses ceder ordaifer encunter il FC Weesen. Ils dus clubs barattan uschia lur plazs en la tabella sur e sut il stritg. Danov è il CB Surses cun 8 puncts cnapp sut, e Weesen cun 10 cnapp sur il stritg.
